საგარეო საქმეთა მინისტრის მოადგილის თეიმურაზ ჯანჯალიას განცხადებით, საქართვლოს კონსტიტუციასა და სხვა მრავალ დოკუმენტში ნათლად არის ასახული, რომ საქართველოს პრიორიტეტი და აუცილებელი პირობა არის ის, რომ გახდეს ევროპის და ევროატლანტიკური ოჯახის წევრი.
მისივე თქმით, ასოცირების დღის წესრიგი, რომელიც ჩვენ გვაქვს, არის ის დოკუმენტი, რომლითაც კანონმდებლობას, რეგულაციებს და ცხოვრების წესს ევროპული ცხოვრების წესთან ვაახლოებთ.
„ჩვენ ძალიან ბევრს ვშრომობთ, ვმუშაობთ და შესაბამისად ვახორციელებთ იმ პოლიტიკას, რომელიც გვაახლოებს ამ მიზნებთან. პირველ რიგში უნდა აღინიშნოს, ევროკავშირთან ასოცირების ხელშეკრულება, რომლის იმპლემენტაციაც არის ერთ-ერთი მთავარი პრიორიტეტი და ჩვენი რეფორმების ერთ-ერთი მთავარი მამოძრავებელი ძალა. ასოცირების დღის წესრიგი, რომელიც ჩვენ გვაქვს, არის სწორედ ის დოკუმენტი, რომლითაც ჩვენს კანონმდებლობას, ჩვენს რეგულაციებს, ჩვენი ცხოვრების წესს ვაახლოებთ ევროპული ცხოვრების წესთან. სწორედ ეს არის ის, რაც განსაზღვრავს დღევანდელ ჩვენს ქმედებებს, იქნება ეს ჩვენს ევროპელ პარტნიორებთან თუ სხვა საერთაშორისო აქტორებთან ურთიერთობა,“-განაცხადა თეიმურაზ ჯანჯალიამ.