დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, საქართველოში ჟანგბადთან დაკავშირებით პრობლემა არ არის.
როგორც გამყრელიძემ კორონავირუსთან დაკავშირებით შექმნილი უწყებათაშორისი საკოორდინაციო საბჭოს სხდომის დასრულების შემდეგ ბრიფინგზე განაცხადა, დღეს ქვეყანაში ჟანგბადის მოთხოვნა შემცირებულია. მისივე თქმით, კლინიკების ჟანგბადით მომარაგება ხდება როგორც ადგილობრივი წარმოების, ისე იმპორტირებული ჟანგბადით.
„ჟანგბადთან დაკავშირებით დღეს პრობლემა არ არის იმიტომ, რომ ქვეყანაში მოთხოვნილება შემცირდა. პიკზე გვყავდა 63 ათასი აქტიური პაციენტი, მათ შორის 8 ათასამდე იყო ჰოსპიტალში და მათ შორის ბევრი ჟანგბადდამოკიდებული. ჟანგბადის პრობლემა ქვეყანაში არ შექმნილა, მიუხედავად გაორმაგებული მოთხოვნილებისა, სახელმწიფომ უზრუნველყო, რომ ყველა სახელმწიფო დაწესებულებას, სადაც ჟანგბადი იყო საჭირო, ეს ჰქონოდა. საკმაოდ გაძლიერებულია ადგილობრივი წარმოება. ბევრ საავადმყოფოს თავისი ჟანგბადის ქარხანა აქვს. ასევე ქვეყანაში რამდენიმე ქარხნის მიერ იწარმოება ჟანგბადი”, - განაცხადა გამყრელიძემ.