პოლიტიკური პლატფორმა „მესამე ძალა-სტრატეგია აღაშენებელი“ ამერიკელ კონგრესმენებს შეხვდა. როგორც გიორგი ვაშაძემ შეხვედრის შემდეგ განაცხადა, საუბარი ქვეყანაში არსებულ მძიმე პოლიტიკურ ვითარებას შეეხო.

ვაშაძის თქმით, პოლიტიკურმა პლატფორმამ ამერიკელ კონგრესმენებთან შეხვედრა ცალკე ფორმატში ითხოვა, რაც მისი თქმით, ორპოლუსიანი წრის გარღვევას გულისხმობს.

„შევხვდით ამერიკელ კონგრესმენებს, ვისაუბრეთ იმ მძიმე ვითარებაზე, რომელიც ჩვენს ქვეყანაშია, რეფორმებზე, რომელიც საქართველოს სჭირდება, არჩევნებზე, რომელიც არის მნიშვნელოვანი საქართველოს დასავლური არჩევანისთვის და რაც მთავარია იმ პოლარიზებულ გარემოზე, რომელიც უნდა დასრულდეს. ასევე ვისაუბრეთ „მესამე ძალის“ იდეაზე, რომელიც მნიშვნელოვანია იმისთვის, რომ გავარღვიოთ ეს ორპოლუსიანი მოჯადოებული წრე.

ჩვენ, „მესამე ძალამ“, მათთან ცალკე შეხვედრა ვითხოვეთ, რადგან ცალკე ვპოზიციონირდებით და გვსურს, რომ ეს ორპოლუსიანი მოჯადოებული წრე გავარღვიოთ“ - განაცხადა გიორგი ვაშაძემ.