გიორგი გახარია ჩემთვის არაფრით განსხვავდება რიჩარდისგან, ნიკა მელიასგან, ანა დოლიძისგან ან ნებისმიერი სხვა კანდიდატისგან - რატომ უნდა დავჯდე გახარიასთან ერთი-ერთზე დებატში, შეგიძლიათ ამიხსნათ ადამიანურად, - ამის შესახებ „ქართული ოცნების“ თბილისის მერობის კანდიდატმა, კახა კალაძემ ჟურნალისტებს განუცხადა და ამით, პარტია „საქართველოსთვის“ დედაქალაქის მერობის კანდიდატის, გიორგი გახარიას შეთავაზება შეაფასა.
კახა კალაძის თქმით, პოლიტიკურ დებატებში ყველასთან ერთად დაჯდება ოპოზიციური ფლანგიდან და არა ცალკე ერთ კანდიდატთან.
„გიორგი გახარია ჩემთვის არაფრით განსხვავდება რიჩარდისგან, ნიკა მელიასგან, ანა დოლიძისგან ან ნებისმიერი სხვა კანდიდატისგან. ჩვენ უნდა ვისწავლოთ ერთმანეთის პატივისცემა. დაახლოებით 16-მდე კანდიდატია წარმოდგენილი და მზად ვარ, ყველა კანდიდატთან დავჯდე. რაღაცით გამორჩევა ვიღაცის, არასწორია ეს. როგორ უნდა დაჯდე ერთი ერთზე, რატომ უნდა დავჯდე გახარიასთან, შეგიძლიათ ამიხსნათ ადამიანურად, ან რატომ უნდა დავჯდე რიჩარდთან ერთი ერთზე, ან ანა დოლიძეთან?! ყველა დავჯდეთ და ნებისმიერ თემაზე ვილაპარაკოთ“, - განაცხადა კახა კალაძემ.