პოლიტიკური პლატფორმა „მესამე ძალა - სტრატეგია აღმაშენებლი“ წინასაარჩევნო კამპანიას განაგრძობს. „მესამე ძალის“ ლიდერი გიორგი ვაშაძე, საკრებულოს თავმჯდომარეობის კანდიდატი სერგო ჩიხლაძე და სამგორის მაჟორიტარობის კანდიდატი ვახო იაშვილი სამგორის მოსახლეობას შეხვდნენ, მოისმინეს ადგილობრივი მცხოვრებლების პრობლემები და ისაუბრეს გადაჭრის გზებზე.

პოლიტიკური პლატფორმის ლიდერების თქმით, მნიშვნელოვანია შეიქმნას სამუშაო ადგილები და ხალხი კვლავ გახდეს პოლიტიკის ცენტრი, რათა მათი პრობლემები გადაიჭრას.

„ჩვენ ვხვდებით მოსახლეობას და ვცდილობთ გავარკვიოთ პრობლემები, რომლებიც მათ აწუხებთ. ყველაზე მნიშვნელოვანი რაც ადგილობრივებს აწუხებთ, პირველ რიგში, არის უმუშევრობა, შემოსავლების ნაკლებობა, მედიკამენტების გაზრდილი ფასები. სწორედ ამიტომ „მესამე ძალის“ იდეა არის, რომ პოლიტიკაში დავაბრუნოთ ის პრობლემები, რომელიც ხალხს აწუხებს“, - განაცხადა გიორგი ვაშაძემ.

ამასთანავე, ვახო იაშვილის თქმით, ხელისუფლება, რომელიც დღეს გვყავს ჩვენი ქვეყნისთვის მხოლოდ „მავნებლის ფუნქციას ასრულებს“.

„სწორედ ამიტომ ჩვენ „მესამე ძალა“ შევცვლით არსებულ ნეგატიურ მხარეს და ხელს შევუწყობთ ქვეყნის განვითარებას. მნიშვნელოვანია, რომ ადამიანი დაფასდეს თავისი ნიჭის, გამოცდილებისა და ცოდნის მიხედვით“, - განაცხადა ვახო იაშვილმა.