არც თბილისში, არც ყვარელში, არსად ქვეყანაში ჩვენი და ჩვენი შვილების უსაფრთხოება დაცული არ არის, - ასე ეხმაურება "ლელოს" თბილისის მერობის კანდიდატი ანა ბიბილაშვილი პრემიერ-მინისტრის, ირაკლი ღარიბაშვილის განცხადებას, რომლის თანახმადაც, ქვეყანაში ადამიანების სიცოცხლე დაცულია.
როგორც ბიბილაშვილმა ბრიფინგზე განაცხადა, ღარიბაშვილის ეს განცხადება ტყუილია.
„პრემიერ-მინისტრის განცხადება, რომ „ქართული ოცნების“ მმართველობის 9 წლის თავზე ქვეყანაში ადამიანების სიცოცხლე დაცულია, არის დაცინვა. მაშინ, როდესაც ჯერ კიდევ გუშინ ადამიანები აიყვანეს მძევლებად და მათ სიცოცხლეს შეუქმნეს საფრთხე, სულ ცოტა ხნის წინ მოკლეს უცხოელი სტუმარი, ამ ქვეყანაში რეალურად ჩვენ არ ვართ დაცული. არც მე არც თქვენ არც ჩვენი შვილები. არა მარტო თბილისში, სხვა ქალაქებში და სოფლებშიც არ ვართ უსაფრთხოდ. ჩვენ შვილებს ვუშვებთ გარეთ და არ ვიცით როგორ დაბრუნდებიან სახლში. შიშია დანერგილი ქვეყანაში. რასაც ცდილობს „ქართული ოცნება“ რომ გვაჩვენოს, თითქოს ყველაფერი რიგზეა არის დიდი ტყუილი. რეალობა კი მხოლოდ ერთია - „ქართული ოცნება“ კრიმინალთანაა შეკრული", - განაცხადა ბიბილაშვილმა.