სახელმწიფო უსაფრთხოების სამსახურის უფროსის პირველი მოადგილე ალექსი ბატიაშვილი ეუთო-ს დემოკრატიული ინსტიტუტებისა და ადამიანის უფლებათა ოფისის საარჩევნო სადამკვირვებლო მისიის (ODIHR) წარმომადგენლებს შეხვდა. ინფორმაციას სახელმწიფო უსაფრთხოების სამსახური ავრცელებს.

მათი ინფორმაციით, შეხვედრაზე მხარეებმა ქვეყანაში და რეგიონში არსებული წინასაარჩევნო გარემო, ასევე, შესაძლო მოსალოდნელი გამოწვევები განიხილეს.

როგორც სახელმწიფო უსაფრთხოების სამსახურში აღნიშნავენ, საუბარი შეეხო არჩევნების მშვიდობიან და სამართლიან გარემოში ჩატარების საკითხსაც.

„სახელმწიფო უსაფრთხოების სამსახურის წარმომადგენლებმა მზაობა გამოთქვეს, დახმარება აღმოუჩინონ მისიას ნებისმიერ საკითხში, რომელიც სახელმწიფო უსაფრთხოების სამსახურის უფლებამოსილებას მიეკუთვნება. მისიამ მადლობა გადაუხადა სახელმწიფო უსაფრთოხების სამსახურს და თავის მხრივ, მზადყოფნა გამოთქვა დახმარებისთვის. შეხვედრას სახელმწიფო უსაფრთხოების სამსახურის ადმინისტრაციისა და საინფორმაციო ანალიტიკური დეპარტამენტების უფროსებიც ესწრებოდნენ“,-აღნიშნულია ინფორმაციაში.