შერიგებისა და სამოქალაქო თანასწორობის საკითხებში საქართველოს სახელმწიფო მინისტრი თეა ახვლედიანი 2001 წლის 11 სექტემბერს, ამერიკის შეერთებული შტატების წინააღმდეგ განხორციელებული ტერორისტული თავდასხმიდან 20 წლისთავს ეხმაურება.

როგორც ახვლედიანი აცხადებს, საქართველო გმობს ტერორიზმის ნებისმიერი ფორმით გამოვლინებას და მოკავშირეებთან ერთად აგრძელებს ერთიან ძალისხმევას გლობალური უსაფრთხოების უზრუნველყოფისთვის.

„ამ წუთებში ამერიკის შეერთებულ შტატებში 2001 წლის 11 სექტემბრის ტერაქტისას დაღუპულთა ხსოვნას პატივს დუმილით მიაგებენ. ვუერთდები ამერიკელ ხალხს და სამძიმარს ვუცხადებ ტერორისტთა ამ შემზარავი შეტევის უდანაშაულო მსხვერპლთა ოჯახებს.

ზუსტად ამ დროს 20 წლის წინ, ადგილობრივი დროით, 08:46 საათზე, ტერორისტების მიერ განხორციელდა პირველი იერიში ნიუ-იორკის მსოფლიო სავაჭრო ცენტრზე. ტერაქტების სერიამ, რომელმაც ათასობით უდანაშაულო ადამიანის სიცოცხლე შეიწირა, ამერიკელ ხალხთან ერთად, მთელი მსოფლიო შეძრა და ყველა მოკავშირე ქვეყანა, მათ შორის საქართველო, ტერორიზმის წინააღმდეგ გააერთიანა.

დღეს ჩვენ, ჩვენი სტრატეგიული პარტნიორის, ამერიკის შეერთებული შტატების ხალხის გვერდით ვდგავართ, ვგმობთ ტერორიზმის ნებისმიერი ფორმით გამოვლინებას და მოკავშირეებთან ერთად ვაგრძელებთ ერთიან ძალისხმევას გლობალური უსაფრთხოების უზრუნველყოფისთვის“, - განაცხადა სახელმწიფო მინისტრმა.