უკანასკნელ წლებში მთაწმინდაზე არაერთი წარმატებული ურბანული პროექტი განხორციელდა და დარწმუნებული ვარ, მოსახლეობის მხარდაჭერით, მომავალში კიდევ უფრო ფართომასშტაბიანი, ახალი ინიციატივებით გავაგრძელებთ ჩვენი რაიონის განვითარების პროცესს, - ამის შესახებ „ქართული ოცნების" თბილისის საკრებულოს მთაწმინდის რაიონისმაჟორიტარი დეპუტატობის კანდიდატმა ზურაბ აბაშიძემ ვერის მოსახლეობასთან შეხვედრისას განაცხადა.
პარტიის პრესსამსახურის ცნობით, მაჟორიტარობის კანდიდატმა წინასაარჩევნო კარდაკარ კამპანიის ფარგლებში შეხვედრები ამჯერად გალის, იაკობ ნიკოლაძის, შარაშიძის, ქუჩიშვილის, ღამბაშიძის, შიო მღვიმელისა და ანანურის ქუჩის მცხოვრებლებთან გამართა, სადაც მოსახლეობისთვის პრიორიტეტული საკითხები და დაგეგმილი პროექტები განიხილა.
მათი ინფორმაციით, ზურაბ აბაშიძემ აღნიშნა, რომ ის ყოველდღიურად ხვდება მოსახლეობას და ისმენს მათ მოთხოვნებსა და პოზიციებს რაიონში არსებული გამოწვევების დაძლევის მიმართულებით.
„მსგავსი შეხვედრები მომავალშიც აუცილებლად გაგრძელდება, რათა მთაწმინდის განვითარების გეგმის ფარგლებში განხორციელებული პროექტები მაქსიმალურად იყოს ორიენტირებული როგორც რაიონის ინფრასტრუქტურის განახლებაზე, ასევე, ადგილობრივი მოსახლეობის საცხოვრებელიპირობების გაუმჯობესებაზე“, - აღნიშნულია ინფორმაციაში.