ნოდარ მელაძე პროკურატურაში გამოკითხვაზე მივიდა

„ტვ პირველის“ საინფორმაციო სამსახურის უფროსი ნოდარ მელაძე პროკურატურაში გამოკითხვაზე ადვოკატთან ერთად მივიდა.

საქმე ეხება ფარულ მასალებს, რომელიც რამდენიმე დღის წინ ინტერნეტსივრცეში გავრცელდა. როგორც მელაძემ უწყებაში შესვლამდე ჟურნალისტებს განუცხადა, აღნიშნულ მასალებში არის თავად იმ ადამიანების პირადი მიმოწერებიც, ვინც სახელმწიფო უსაფრთხოების სამსახურში მოსმენას აწარმოებდნენ. მისივე თქმით, მასალების მიხედვით ჩანს, რომ მოსმენის შემდეგ გაშიფრული მასალა ხელმძღვანელ პირებთან იგზავნებოდა.

„ისეთ რაღაცებს უსმენდნენ, იღებდნენ, აკონტროლებდნენ, რომელსაც კავშირი არაფერთან აქვს და ეხება მღვდლის და მონაზვნის პირად ცხოვრებას, მხოლოდ მათ პირადს და სხვას არაფერს. სრული ამორალურობაა, როდესაც სახელმწიფო უსაფრთხოების სამსახური ამას აკეთებდა.

ჟურნალისტებისთვის გადმოგზავნილ ფაილებს შორის არის მომსმენი ადამიანების პირადი მიმოწერებიც - როდესაც ეს 9 ადამიანი, სასულიერო პირებს ან ჟურნალისტებს მოუსმენდნენ, რა რეაქციები ჰქონდათ და როგორ, რა იგეგმებოდა, ისმინებოდა. ხდებოდა არა მოსმენა, არამედ გადასმენა. რასაც ვერ ასწრებდნენ, ღამე რჩებოდნენ და მთელი დღის განმავლობაში ჩაწერილებს შიფრავდნენ და ამბობდნენ - სწრაფად, სწრაფად,ზევით ელოდებიანო. ეს დადოკუმენტირებულია. მათი ხელმძღვანელები ელოდებოდნენ და სასწრაფოდ უნდა ჰქონოდათ ინფორმაცია, რომელი მღვდელი სად მივიდა, ვის ელაპარაკა, რომელ მონაზონთან რა შეტყობინება გააგზავანა, ან ბანკიდან რომელ მღვდელთან რა შეტყობინება გაიგზავნა. ეს არის საქართველოს ისტორიაში უკანონო მოსმენების ყველაზე მასშტაბური უკანონო აქტი, რაც არ შეიძლება იყოს დაუსჯელი. პასუხისგებაში უნდა იყოს მიცემული ყველა, ხელმძღვანელი პირებიდან დაწყებული. ეს არის სისტემური დანაშაული. ამას უსმენდა მთელი ბრიგადა, კითხულობდა მთელი სახელმწიფო ელიტა და არსებობს გონივრული ეჭვი, რომ ეს ინფორმაცია მხოლოდ სუს-ში არ ილექებოდა, გადარჩეული სახით ეგზავნებოდა მაღალი რანგის პოლიტიკურ ხელმძღვანელ პირებს“, - განაცხადა მელაძემ.

შეგახსენებთ, ინტერნეტსივრცეში გავრცელდა მასალები, რომელიც სავარაუდოდ, სუს-ის მიერ ფარული მიყურადების გზით პოლიტიკოსების, სასულიერო პირებისა და ჟურნალისტების მოსმენას და თვალთვალს უკავშირდება.

დიმიტრი შველიძე - ახლა პოლიტიკური ელიტა იდეებისაგან დაცლილია, ფულის ფაქტორი გადამწყვეტია, სოციალური პოლარიზაცია უძლეველია და კაცმა არ იცის, ელექტორატის უმრავლესობა ვის უჭერს მხარს
ქართული პრესის მიმოხილვა 20.09.2021
თენგიზ ფხალაძე - საშიშ ფაზაში ვიმყოფებით, მსოფლიოში მიმდინარე პროცესები ყურადღების მიღმა გვრჩება, ყველაფერს ვაკეთებთ სახელმწიფოს ჩამოსაშლელად, მოწინააღმდეგეს მხოლოდ ისღა რჩება, რომ ამ პროცესში ხელი არ შეგვიშალოს
დიდი ფასდაკლება შერჩეულ პროდუქციაზე - სექტემბრის ტოპ შეთავაზება „მიჰაუსისგან“
კომპანია “ლისი რეკრეაცია” ლისის ტბასთან დაკავშირებით ინფორმაციას ავრცელებს