ვერაზე, ანჯაფარიძის ქუჩაზე დაჭრილი ახალგაზრდა დღეს დილით გარდაიცვალა. ინფორმაცია „ინტერპრესნიუსს“ სიმონ ხეჩინაშვილის სახელობის საუნივერსიტეტო კლინიკაში დაუდასტურეს.
ექიმ ნიკოლოზ კვაჭაძის განცხადებით, სიცოცხლესთან შეუთავსებელი ჭრილობების გამო, პაციენტის გადარჩენა ვერ მოხერხდა.
„კლინიკაში მოყვანილი იყო ახალგაზრდა ბიჭი, სავარაუდოდ, ცეცხლსასროლი იარაღით მიყენებული მრავლობითი ჭრილობებით, სხეულის სხვადასხვა ნაწილზე. ჩაუტარდა გადაუდებელი ქირურგიული დახმარება, მკურნალობაც, მაგრამ ჩატარებული მკურნალობის მიუხედავად, სიცოცხლესთან შეუთავსებელი ჭრილობების გამო, დღეს, დილის 05:00 საათზე დაფიქსირდა ბიოლოგიური სიკვდილი", - განაცხადა ექიმმა.
გუშინ, ვერაზე ახალგაზრდა ბიჭი დაჭრეს. არსებული ინფორმაციით, დაპირისპირებას წინ ურთიერთშელაპარაკება უძღოდა. როგორც „ინტერპრესნიუსს“ შსს-ში განუცხადეს, მომხდართან დაკავშირებით გამოძიება საქართველოს სისხლის სამართლის კოდექსის 19-108-ე და 236-ე მუხლით დაიწყო, რაც მკვლელობის მცდელობასა და ცეცხლსასროლი იარაღის უკანონო შეძენა-შენახვა-ტარებას გულისხმობს.