„ევროპული საქართველოს“ ჩუღურეთის საერთო ოპოზიციური მაჟორიტარობის კანდიდატის გიორგი ნონიაშვილის შეფასებით, „მთავარი არხის“ ოპერატორის დაშავებაზე პასუხისმგებელი ხელისუფლებაა. როგორც მან ჟურნალისტებს განუცხადა, „ქართულმა ოცნებამ“ მედიის მიმართ ძალადობა 5 ივლისს განვითარებული მოვლენების დროს წაახალისა.

„ჟურნალისტებზე ძალადობის გუშინდელი მაგალითი და ზოგადად, უკანასკნელი 2 თვის მანძილზე გამძაფრებული აგრესია ჟურნალისტების მიმართ, მხოლოდ და მხოლოდ ხელისუფლების პასუხისმგებლობაა, მან გამოუშვა ეს ძალადობრივი საფრთხობელა 5 ივლისს და ფაქტობრივად უთხრა, მიდით დაჩაგრეთ, იძალადეთ და არავის მოეკითხება პასუხი, მათ წაახალისეს ეს ძალადობა. ყველა ხელისუფლება უნდა დასრულდეს, რომელიც ადამიანებს აპირისპირებს და საზოგადოებაში შუღლს აღვივებს“, - განაცხადა ნონიაშვილმა.

ცნობისთვის, ქარელში "ქართული ოცნების" შტაბში ინციდენტი მოხდა, რა დროსაც "მთავარი არხის" ოპერატორი ლევან აბლოთია დაშავდა. "მთავარი არხის" დირექტორის ნიკა გვარამიას ინფორმაციით, ოპერატორი აივნიდან გადმოაგდეს. "ქართულ ოცნებაში" აღნიშნულს სიცრუეს უწოდებენ და აცხადებენ, რომ ოპერატორი "კიბის ბაქანზე მოაჯირს წამოედო და გადავარდა".