პოლიციამ იმ მხდალი მთავარსარდლისგან რა მოწოდება უნდა მიიღოს, რომელიც გორში ფორთხავდა - ასეთი ადამიანის მოწოდებების მის სექტაშიც აღარ სჯერათ, - ამის შესახებ ჟურნალისტებს „ქართული ოცნების" დეპუტატმა ირაკლი ზარქუამ განუცხადა.

ზარქუას თქმით, მიხეილ სააკაშვილმა იცის, რომ თვითმმართველობის არჩევნებზე მარცხდება და იმდენად აგონიასა და სასოწარკვეთაშია, რომ პოლიციელების მიმართ დატკბა.

„გახსოვთ, რომ ცოტა ხნის წინ პოლიციელებს „გაიშნიკებს”, კორუმპირებულებსა და მონებს ეძახდა. დღეს, როცა დასჭირდა, თავისი ჭკუით ლამაზი სიტყვებით თაფლავს. სინამდვილეში, პოლიცია და ძალოვანი სისტემა პოლიტიზირებული სწორედ მიხეილ სააკაშვილის დროს იყო. ამ მოვლენის დამადასტურებელი არაერთი მაგალითი გვახსოვს. 2014 წლიდან მოყოლებული, ამ სექტორში ხელფასები არაერთხელ გავზარდეთ, სოციალური პაკეტები გავაუმჯობესეთ. როდესაც მათ ხეფასებს ვუზრდიდით და ამ მიზნით ბიუჯეტში ცვლილებები შეგვქონდა, რადიკალური ოპოზიციის ყიჟინა გახსოვთ, თავის პოლიტიკურ პოლიციას, „გაიშნიკებს" ხელფასებს უზრდიანო... ახლა, როცა დასჭირდა, ფირფიტა შეცვალა! ასეთია მიხელ სააკაშვილის მიდგომა, რომლის არავის სჯერა", - განაცხადა ირაკლი ზარქუამ.