„ფორმულას“ დღევანდელი ქმედება სცდება არა მარტო მედია სტანდარტებს, არამედ ყველანაირ ეთიკურ საზღვრებს, - ამის შესახებ საბურთალოს მაჟორიტარობის დამოუკიდებელმა კანდიდატმა ვატო შაქარიშვილმა განაცხადა, რითაც გამოეხმაურა 22 წლის ახალგაზრდის, ნიკა კვარაცხელიას მკვლელობის ამსახველი კადრების გავრცელებას.
მისი თქმით, სასწრაფოდ მისაღებია კანონი, რომლითაც აიკრძალება ადამიანის ფსიქოლოგიური ტერორი, ცილისწამება და ყალბი ცნობების გავრცელება მასობრივი ინფორმაციის საშუალებები.
„ის, რაც დღეს ტელევიზიად წოდებულმა „ტვ. ფორმულამ“ გააკეთა - გაავრცელა უმძიმესი კადრები - სცდება არა მხოლოდ მედია სტანდარტებს, არამედ ყოველგვარ ეთიკურ საზღვრებს. აღნიშნული ქმედება შეიძლება შეფასდეს, როგორც „ტვ. ფორმულას“ მხრიდან ადამიანის ცნობიერებაზე ძალადობა, რამაც კონკრეტული მედია საშუალებების მხრიდან სისტემატური ხასიათი მიიღო. აღნიშნული ფაქტი კიდევ ერთხელ ცხადყოფს, რომ სასწრაფოდ მისაღებია კანონი, რომლითაც აიკრძალება ადამიანის ფსიქოლოგიური ტერორი, ცილისწამება და ყალბი ცნობების გავრცელება მასობრივი ინფორმაციის საშუალებებით“, - განაცხადა ვატო შაქარიშვილმა.
ინფორმაციას პრესსამსახური ავრცელებს.