როგორც ჩანს, ეს სტრუქტურა, დავარქმევთ მას სოდ-ს, კუდ-ს თუ სუს-ს, შინაარს არასდროს იცვლის და საბჭოურ ზნეს არ ღალატობს, - აღნიშნული განცხადება ჟურნალისტებთან დეპუტატმა ალეკო ელისაშვილმა გააკეთა.
ელისაშვილის შეფასებით, „ქართულმა ოცნებამ“ ოპერატიულ ტექნიკური სამსახური მშვენივრად მოირგო და უფრო მეტი გაშმაგებით გვისმენს და გვითვალთვალებს.
„მიაჩნიათ, რომ ნორმალურია, როცა ადამიანის ცხოვრებაში იჭრები, უკანონოდ უთვალთვალებ და რაღაცებს იწერ. ამ ფაილების გამოყრა სწორედ ამის დასტურია. "ქართული ოცნება" წუწუნებდა და დემონსტრაციულად დისკებს ამსხვრევდა, თითქოს საბჭოთა ტრადიცია წარსულს ჩავაბარეთ, სინამდვილეში, ოპერატიულ ტექნიკური სამსახური მშვენივრად მოირგო და კიდევ უფრო მეტი გაშმაგებით გვისმენს და გვითვალთვალებს. ოდესმე ეს უნდა დავასრულოთ", - განაცხადა ალეკო ელისაშვილმა.
მან აქვე აღნიშნა, რომ გიორგი გახარიამ მკაფიოდ უნდა თქვას, იცოდა თუ არა რას სჩადიოდა სუს-ი და იყო თუ არა ამ ყველაფრით დაკავებული მისი მეგობარი ალექსანდრე ხოჯევანიშვილი.