20 ივნისის მიტინგის დაშლასთან დაკავშირებით, კონკრეტული კითხვები არსებობს და არსებობდა მაშინაც, - ამის შესახებ თბილისის მერმა კახა კალაძემ განაცხადა, რითაც ირაკლი ღარიბაშვილის გუშინდელ განცხადებას გამოეხმაურა.
კახა კალაძის განმარტებით, აღნიშნულ აქციაზე მოქალაქეთა გულწრფელი პროტესტი პოლიტიკოსებმა სათავისოდ გამოიყენეს.
„ძალიან ცუდი იყო ყველაფერი, რაც მოხდა. მძიმე სანახავი იყო 20 ივნისის ღამე. არ იყო სწორი ამ ღონისძიების პარლამენტში ჩატარება, არ იყო სწორი იმ ადამიანის საქართველოში შემობრძანება, არ იყო სწორი ის თუ როგორ ჩატარდა ოპერაცია. მიუხედავად იმისა, რომ ცდილობდნენ პარლამენტში შევარდნას, ეს ყველაფერი ცუდი სანახავი იყო და ახლაც რომ ვიხსენებ, ძალიან გულდასაწყვეტია. იმ ადამიანების აღშფოთება, ვინც მართლა გულწრფელად იყო მისული და აპროტესტებდა სხვა რამეს, ძალიან ცუდად სცადეს პოლიტიკოსებმა ამის გამოყენება, რაც განპირობებული იყო პარლამენტში შევარდნით და ეს ძალიან ცუდი სანახავი იყო“, - განაცხადა კალაძემ.
მისივე თქმით, 2019 წლის ივნისის მოვლენებთან დაკავშირებით სამართლებრივი რეაგირება სრული სიზუსტით წარიმართა.
„ამასთან დაკავშირებით გამოძიება დაწყებული იყო. რამდენიმე პოლიციელის მისამართით სისხლის სამართლის საქმე იყო აღძრული. ასევე კონკრეტული პოლიტიკოსების მიმართ, კონკრეტულად იმ ადამიანების მიმართ, ვინც ჩართული იყო პარლამენტში შევარდნაში, თუმცა მათთან დაკავშირებით პარლამენტმა ამნისტია მიიღო“, - აღნიშნა თბილისის მერმა.