ხელისუფლებამ აუცილებლად უნდა გამოიძიოს როგორ და ვის მიერ მოხდა ამ ინფორმაციის გადინება და ფაილების გატანა. ეს არის სპეცსამსახურების მძიმე დისკრედიტაცია, დარტყმა სახელმწიფოზე, შესაბამისად, მნიშვნელოვანია ამ საქმეზე კვალიფიციური გამოძიება და სამართლებრივი პასუხისმგებლობის დაკისრება, - ამის შესახებ პარტია "ევროპელი დემოკრატების“ გენერალურმა მდივანმა მამუკა გამყრელიძემ განაცხადა.
მამუკა გამყრელიძის თქმით, ვინაიდან საზოგადოებაში დაკარგულია ნდობა ძალოვანი უწყებების მიმართ, ფაილების სკანდალის გამოძიებაში პარლამენტის „ნდობის ჯგუფის“ წევრების ჩართვაც შესაძლოა, მოხდეს.
"სასწრაფოდ უნდა მოხდეს ამ საკითხის გამოძიება. ძალიან მნიშვნელოვანია იმის გარკვევა, ეს მოსმენები იყო თუ არა სანქცირებული, ჰქონდა თუ არა კანონიერი საფუძველი. საზოგადოებაში დაკარგულია ნდობა ძალოვანი სტრუქტურების მიმართ, შესაბამისად, საკითხი განხილული უნდა იყოს საპარლამენტო დონეზე. პარლამენტის ნდობის ჯგუფის საქმიანობა გარკვეულ სახელმწიფო საიდუმლოებებთან დაშვებას ითვალისწინებს, შესაძლებელია, ამ ჯგუფის წევრების ჩართვა გამოძიებაში, რომ მივიღოთ სანდო პასუხები შეკითხვებზე, რაც ამ თემასთან დაკავშირებით არსებობს“,- განაცხადა მამუკა გამყრელიძემ.
მამუკა გამყრელიძის კომენტარს „ევროპელი დემოკრატები” ავრცელებს.