“ლელოს” ვაკის მაჟორიტარობის კანდიდატის, მედეა მეტრეველის განცხადებით, სამარცხვინოა თბილისის მერის კახა კალაძის განცხადება, თითქოს მიუსაფარი ცხოველები მოსახლეობას დისკომფორტს უქმნიან.

მეტრეველის თქმით, მიუსაფარი ცხოველები კი არ ქმნიან დისკომფორტს, არამედ მახინჯი პოლიტიკა და საბიუჯეტო სახსრების არამიზნობრივი ხარჯვა, რომელსაც „მერია და ცხოველთა მონიტორინგის სააგენტო“ ეწევა ცხოველთა პოპულაციის მართვასთან დაკავშირებით.

„ცხოველები დისკომფორტს უქმნიან მოსახლეობასო - ასეთი სამარცხვინო განცხადება გააკეთა თბილისის მერმა ეს წუთია საზოგადოებრივი მაუწყებლის დებატებში. ბატონო მერო, დისკომფორტს მიუსაფარი ცხოველები კი არ უქმნიან მოსახლეობას, არამედ ის მახინჯი პოლიტიკა და საბიუჯეტო სახსრების არამიზნობრივი ხარჯვა, რომელსაც მერია და ცხოველთა მონიტორინგის სააგენტო ეწევა ცხოველთა პოპულაციის მართვასთან დაკავშირებით. ამ განცხადებით თქვენ მიაყენეთ შეურაცხყოფა ცხოველთა უფლებების დამცველებს და იმ ადამიანებს, რომლებიც წლებია მიუსაფარი ცხოველების გადასარჩენად იბრძვიან,”- განაცხადა მეტრეველმა. ინფორმაციას „ლელოს“ პრესსამსახური ავრცელებს.