ჯანდაცვის მსოფლიო ორგანიზაციის საქართველოს წარმომადგენლობის ხელმძღვანელის, სილვიუ დომენტეს განცხადებით, საქართველოში ვაქცინაციის ტემპი მცირედით იკლებს, თუმცა ზოგადად პროგრესი მაინც შეინიშნება იმ პერიოდთან შედარებით, როდესაც საქართველომ პირველად დაიწყო ვაქცინის ადმინისტრირება.
„ვაქცინაციის ტემპი მცირედით იკლებს, მაგრამ, ზოგადად, უნდა ვთქვა, დიდი პროგრესი იქნა მიღწეული ვაქცინაციის მიმართულებით. ამის თქმის საფუძველს ის რაოდენობრივი მაჩვენებლები მაძლევს, რომელიც ვაქცინის ადმინისტრირების დასაწყისში, ივნისსა და ივლისში ფიქსირდებოდა. ვაქცინაციის ყოველდღიური მაჩვენებელი ხუთ-ექვს ათასს არ აჭარბებდა, ხოლო პიკზე, აგვისტოში, ყოველდღიურად 17000 აცრა ტარდებოდა, რაც ნამდვილად კარგი მაჩვენებელია ქვეყნის მოსახლეობის რაოდენობიდან გამომდინარე“, - განაცხადა სილვიუ დომენტემ.