გავრცელდა ინფორმაცია, რომ მთავრობა იღებს სესხს აზიის განვითარების ბანკიდან, ეს სესხი არის გაცილებით ნაკლებშეღავათიანი ვიდრე ევროკავშირის დაფინანსება, უბრალოდ ევროკავშირთან შეირცხვინეს თავი და არ შეასრულეს ვალდებულება სასამართლოს რეფორმასთან მიმართებაში, - ასე ეხმაურება პარტია „ლელო საქართველოსთვის” ერთ-ერთი ლიდერი ბადრი ჯაფარიძე ინფორმაციას, რომლის თანახმად, აზიის განვითარების ბანკმა საქართველოს ელექტროგადამცემი სექტორის გაძლიერებისთვის 100 მილიონი დოლარის ოდენობის საბიუჯეტო სესხი დაამტკიცა.
ბადრი ჯაფარიძის განცხადებით, ფაქტია, რომ მმართველი გუნდის მხრიდან ეს არის მორიგი ტყუილი, თითქოს „არიან ისეთ ფორმაში, რომ შეამცირონ ჩვენი ქვეყნის დავალიანება”.
„ქართულმა ოცნებამ“ სამჯერ მოახერხა დაერღვია პირობა ევროკავშირთან. ბოლო ურცხვი ტყუილი მდგომარეობდა იმაში, რომ „ქართულმა ოცნებამ“ უარი თქვა ევროკავშირის 300 - მილიონიან უკიდურესად შეღავათიან ფინანსირებაზე, თურმე უნდოდათ შემცირება სესხების, ესეც აღმოჩნდა რამდენიმეკვირიანი ტყუილი. დღეს გავრცელდა ინფორმაცია, რომ მთავრობა იღებს სესხს აზიის განვითარების ბანკიდან, ეს სესხი არის გაცილებით ნაკლებშეღავათიანი ვიდრე ევროკავშირის დაფინანსება, უბრალოდ ევროკავშირთან შეირცხვინეს თავი და არ შეასრულეს ვალდებულება სასამართლოს რეფორმასთან მიმართებაში. ისევ ჩვენი მეგობრების დახმარებით ვიღებთ ფინანსირებას, რომელიც ქვეყანას სჭირდება ინფრასტრუქტურული პროექტირებისათვის, მაგრამ ფაქტია, რომ ეს არის მორიგი ტყუილი, თითქოს არიან ისეთ ფორმაში, რომ შეამცირონ ჩვენი ქვეყნის დავალიანება”, - აღნიშნა ბადრი ჯაფარიძემ.