“ლელოს” თბილისის მერობის კანდიდატი ანა ბიბილაშვილი 2 ოქტომბრის არჩევნებზე საუბრობს და აცხადებს, რომ ადამიანებს არავინ ესაუბრება იმაზე, თუ რა შეიცვლება მათ ცხოვრებაში სამი ოქტომბრიდან.

ბიბილაშვილი იმასაც უსვამს ხაზს, რომ ხელისუფლება მხოლოდ სიძულვილის ენაზე საუბრობს და ადამიანებამდე არ მიაქვს მთავარი სათქმელი - რა მნიშვნელობა აქვს მათ ხმას არჩევნებზე.

“ნაცვლად იმისა, რომ ყველამ ვისაუბროთ, თუ როგორ გამოვიყვანოთ ქვეყანა უმძიმესი მდგომარეობიდან, ისე მოვიდა არჩევნები, შინაარსი ვერ დავანახეთ ადამიანებს, რომ მნიშვნელოვანია მათი ხმა. ხალხს არავინ ეუბნება რა შეიცვლება 3 ოქტომბრიდან მათ ცხოვრებაში.

ისევ სიძულვილს და ძალადობას აყურებინებენ, ცდილობენ დანერგონ შიში. ადამიანებში მომწიფებულია სასიკეთო ცვლილებების სურვილი, ყველა ძალიან კარგად ხედავს, რომ ქვეყნის დანგრევის გაგრძელება აღარ შეიძლება. ღრმად მწამს, რომ 3 ოქტომბრიდან პოზიტიური ცვლილებები დაიწყება”, - აღნიშნა ბიბილაშვილმა.

მისივე განმარტებით, “ლელო” ყოველდღიურად ხვდება ასობით ადამიანს და მათთან ერთად არჩევნებში მონაწილეობის აუცილებლობაზე საუბრობს.

როგორც ბიბილაშვილმა აღნიშნა, თბილისის და სრულიად საქართველოს მოსახლეობა სამომავლო ცვლილებების მოლოდინშია.