მცდარი მსჯელობაა, როდესაც პირდაპირ, ავტომატურად, მთავარ ეჭვმიტანილად და დამნაშავედ სახელმწიფო გამოიყვანეს, - ამის შესახებ პარლამენტის ადამიანის უფლებათა დაცვის კომიტეტის თავმჯდომარე მიხეილ სარჯველაძემ ფარულ ჩანაწერებთან დაკავშირებით განაცხადა.
როგორც სარჯველაძემ ჟურნალისტებთან საუბრისას აღნიშნა, ისეთი მნიშვნელოვანი საჯარო დაწესებულების გამართულ მუშაობას, როგორიც სახელმწიფო უსაფრთხოების სამსახურია, დღეს უდიდესი მნიშვნელობა აქვს, და ამის უზრუნველყოფა მის ამჟამინდელ ხელმძღვანელს გრიგოლ ლილუაშვილს შეუძლია.
„მცდარი მსჯელობაა, როდესაც პირდაპირ, ავტომატურად დაადანაშაულეს და მთავარ ეჭვმიტანილად გამოიყვანეს სახელმწიფო. ამიტომ არის აუცილებელი, რომ გამოძიების რეზულტატს დაველოდოთ და მერე გავაკეთოთ შეფასებები.
ხოლო რაც შეეხება ლილუაშვილის განცხადებას, აბსოლუტურად რელევანტურია, სწორია და გამიკვირდებოდა, რომ სხვაგვარი დამოკიდებულება ყოფილიყო, აბსოლუტურად სხვაგვარი დამოკიდებულებაა, როდესაც ახლა განსაკუთრებული მნიშვნელობა აქვს ისეთი მნიშვნელოვანი საჯარო დაწესებულების გამართულ ფუნქციონირებას, როგორიცაა სახელმწიფო უსაფრთხოების სამსახური და ამის უზრუნველყოფა რეალურად შეუძლია იმ კაცს, რომელიც ამჟამად ხელმძღვანელობს ამ დაწესებულებას“, - განაცხადა სარჯველაძემ.