სალომე სამადაშვილი - უკიდურესად შემაშფოთებელი იყო პრემიერის მხრიდან მინიშნება, რომ ხალხის დაორგანიზებას აპირებს, ეს არის ძალიან სახიფათო

„ნაციონალური მოძრაობის“ ამომრჩეველი ძალიან დაბნეულია. ამ ხალხის მობილიზებას არჩევნებისთვის სააკაშვილის ჩამოსვლის დაპირება ძალიან დაეხმარება , - ამის შესახებ ფრაქცია „ლელო - პარტნიორობა საქართველოსთვის“ წევრმა სალომე სამადაშვილმა „პალიტრანიუსის“ ეთერში, გადაცემაში „პოლიტიკური სივრცე“ განაცხადა.

როგორ სამადაშვილი განმარტავს, არჩევანი არსებობს იმ ხალხისთვის, ვისაც არც „ნაციონალური მოძრაობა“ უნდა და არც „ქართული ოცნება“.

„ ვფიქრობ, „ნაციონალურმა მოძრაობამ“ საპარლამენტო არჩევნების შემდეგ საკუთარი ამომრჩეველი საკმაოდ დააბნია. ძალიან დიდი ხანი იყო რადიკალურ პოზიციაზე პარლამენტში შესვლასთან დაკავშირებით, გახსოვთ, ჩემი პარტიიდან წამოსვლის მიზეზი, შარლ მიშელის დოკუმენტზე ხელმოწერას ვურჩევდი პარტიას და არ გაითვალისწინეს ჩემი რჩევა, შემდეგ კი მოუწიათ დოკუმენტზე ხელის მოწერა 6 თვის დაგვიანებით.

ჩემი აზრით, მათი ამომრჩეველი ძალიან დაბნეულია. ამ ხალხის მობილიზებას არჩევნებისთვის სააკაშვილის ჩამოსვლის დაპირება ძალიან დაეხმარება. ეს შემიძლია დანამდვილებით გითხრათ. გეთანხმებით, რომ სააკაშვილის ფიგურა ყოფს ადამიანებს და მობილიზაციას უკეთებს მომხრეებსაც და მოწინააღმდეგეებსაც.

როდესაც 9 წელი გავიდა და „ქართული ოცნება“ იმ მდგომარეობაში ჩაყენებულ საზოგადოებას, რომელშიც ჩვენ აღმოვჩნდით, მათი მმართველობის შედეგად ისევ წარსულის დაბრუნების შიშის გზავნილებით ესაუბრება, ამომრჩეველზე ეს ფაქტორი ნაკლებად იმუშავებს მაშინ, როდესაც განსაკუთრებით მრავალფეროვანი არჩევანია. არჩევანი არსებობს იმ ხალხისთვის, ვისაც არც „ნაციონალური მოძრაობა“ უნდა და არც „ქართული ოცნება“, - აღნიშნავს სამადაშვილი.

კითხვაზე, გაბედავს თუ არა „ქართული ოცნება“ სააკაშვილის დაჭერას, როდესაც საქართველოში ჩამოვა, სამადაშვილი განმარტავს, რომ „როგორც სააკაშვილს გაუჭირდება უკან დაიხიოს იმ დაპირებიდან, რომ ის ჩამოდის, ასევე გაუჭირდება „ქართულ ოცნებას“ გზა მოძებნოს თავიდან აიცილოს მისი დაპატიმრების მცდელობა“.

„ჩვენ დღეს ვნახეთ, „ქართული ოცნების“ წარმომადგენლების განცხადებები. ჩემთვის უკიდურესად შემაშფოთებელი იყო მინიშნება პრემიერის მხრიდან, რომ ხალხის დაორგანიზებას აპირებს. ეს არის ძალიან სახიფათო, ვისაც არ უნდა ეხებოდეს საქმე. ეს არის სახელმწიფოსთვის ძალიან საშიში განცხადება, როდესაც ამას აკეთებს პრემიერი, რომელმაც ფაქტობრივად ინსპირირება გაუკეთა 5 ივლისის ძალადობას. მინდა ჩემი შეშფოთება დავაფიქსირო ამასთან დაკავშირებით.

ვფიქრობ, ალბათ, როგორც სააკაშვილს გაუჭირდება უკან დაიხიოს იმ დაპირებიდან, რომ ის ჩამოდის, ასევე გაუჭირდება „ქართულ ოცნებას“ გზა მოძებნოს თავიდან აიცილოს მისი დაპატიმრების მცდელობა. მე მყარად მიმაჩნია, რომ მიხეილ სააკაშვილი პოლიტიკური ნიშნით დევნილია“,-აღნიშნავს სამადაშვილი.

სალომე სამადაშვილი, ადგილობრივი თვითმმართველობის არჩევნების შემდეგ აქციებს არ გამორიცხავს. როგორც ის განმარტავს, პროტესტი და აქციები პოლიტიკური აქტივობის ნაწილია და მისთვის სასაცილოა „ქართული ოცნების“ ანტიაქციების პოზიცია.

„ჩვენს ისტორიას თუ გადავხედავთ, ძალიან სასაცილოა „ქართული ოცნება“ რომ იკავებს ანტიაქციების პოზიციას. გეგონება თვითონ ხელისუფლებაში უნივერსიტეტის კათედრიდან მოვიდნენ, ან აკადემიური გარემოდან. ყველას გვახსოვს ქუჩის აქციები იმ წლების განმავლობაში. ქუჩის აქციები და პროტესტი პოლიტიკური აქტივობის ნაწილია“,- აღნიშნავს სამადაშვილი.

იხილეთ ვიდეო:

მეთიუ ბრაიზა - მიხეილ სააკაშვილის დაბრუნებამ კრიზისული სიტუაცია კიდევ უფრო გაამძაფრა, მაგრამ ყოფილი პრეზიდენტის დაკავება არ იყო ჭკვიანური პოლიტიკური ნაბიჯი
ქართული პრესის მიმოხილვა 21.10.2021
რამაზ საყვარელიძე - თუ მრავალპარტიულობა ხელოვნურია, საარჩევნო დონეზე შესაძლოა მას ჰქონდეს შედეგი, მაგრამ რეალური მრავალპარტიულობა მაინც არ გვექნება და გადაწყვეტილებების მიმღები ერთი პარტია იქნება
ფესტივალი „მუსიკა შენს ფანჯრებთან“ ერთი დღით „თბილისი მარიოტის" ღია ეზოში ბრუნდება
ჯანდაცვის ასი ექსპერტი WHO-ს მიმართავს
„სინერჯი” „აიტექნიკსის“ პარტნიორი-მეწილე გახდა
"ტერაბანკი" ბიზნესს მრავალფეროვან სატარიფო პაკეტებს სთავაზობს
კოლიერსის საოფისე სერვისების პოსტპანდემიური ტრანსფორმაცია
ევროპის საინვესტიციო ბანკმა ტერაბანკს გრძელვადიანი საკრედიტო რესურსი გამოუყო