ვიოლა ფონ კრამონის განცხადება აღვიქვი როგორც რაღაცნაირი დაღლილობა ჩვენი პრობლემებისგან - ნამეტანი მოგვივიდა, - ეს განცხადება ჟურნალისტებთან პარლამენტის წევრმა ვახტანგ მეგრელიშვილმა გააკეთა.

მისივე თქმით, თავად პრობლემა გახდა საუბარი, ჩამოვა თუ არ ჩამოვა მიხეილ სააკაშვილი საქართველოში.

"მთელი პოლიტიკური პროცესი ამ თემას აქვს წაღებული და ადგილი არ რჩება რეალური პოლიტიკური ცხოვრებისთვის. ქვეყანაში არც არაფერი ხდება საიმისო, რომ ერთი ადამიანის ჩამოსვლა დესტაბილიზაციას იწვევდეს საქართველოსთვის", - აღნიშნა ვახტანგ მეგრელიშვილმა.

ევროპარლამენტარმა ვიოლა ფონ კრამონმა "ტვიტერზე" განცხადება გამოაქვეყნა, რომელშიც აღნიშნავს, რომ პოლარიზებულ საქართველოს გადამწყვეტი არჩევნები ელოდება. ნავი კი არცერთმა პოლიტიკოსმა არ უნდა გაარყიოს. ევროპარლამენტარის თქმით, ევროკავშირს არ გააჩნია არც რესურსი და არც სურვილი იშუამავლოს კიდევ ერთ არასაჭირო პოლიტიკურ კრიზისში, რომელიც აუცილებლად შეიქმნება სააკაშვილის დაბრუნების შემთხვევაში. კრამონის თქმით, მან და მისმა კოლეგებმა ყოველივე ეს მკაფიოდ განუმარტეს საქართველოს ყოფილ პრეზიდენტს ბოლოდროინდელი შეხვედრების დროს. კრამონის განცხადებით, ამ პოზიციას ასევე ფართოდ იზიარებენ ევროკავშირის სხვა ინსტიტუტებიც.