ხელისუფლება რეალურად სირაქლემას პოზიციაშია - რა უნდა თქვას, ის, რომ საზღვრებს ვერ აკონტროლებენ ამ ქვეყანაში? მიხეილ სააკაშვილი არის ადამიანი, რომელსაც ამ ქვეყანაში პერსონალურად ძალიან ბევრი მხარდამჭერი ჰყავს, - ამის შესახებ პარლამენტის წევრმა თამარ კორძაიამ ჟურნალისტებს განუცხადა, რითაც გამოეხმაურა მიხეილ სააკაშვილის განცხადებას, რომ საქართველოშია.
თამარ კორძაიას თქმით, სააკაშვილის ჩამოსვლასთან დაკავშირებით აქვს ის ინფორმაცია, რაც ამის თაობაზე “ნაციონალური მოძრაობის” წევრ ეკა ხერხეულიძისგან მოისმინა და ამ შემთხვევაში, უნდობლობის საფუძველი არ აქვს.
„მე მაქვს საფუძველი უფრო მეტად ვენდო მიხეილ სააკაშვილს და მისი გუნდის წევრებს, ვიდრე ხელისუფლებას, იმიტომ, რომ ხელისუფლება იმასაც ამბობდა, სუს-იდან გაჟონილი ფაილები საერთოდ არ არსებობსო, ისე როგორც გრიგოლ ლილუაშვილმა განაცხადა, მე არაფერ შუაში ვარო. ხელისუფლება რეალურად სირაქლემას პოზიციაშია იმიტომ, რომ რა უნდა თქვას? ის, რომ ჩვენ საზღვრებს ვერ ვაკონტროლებთ ამ ქვეყანაშიო? მიხეილ სააკაშვილი არის ადამიანი, რომელსაც ამ ქვეყანაში პერსონალურად ძალიან ბევრი მხარდამჭერი ჰყავს და მისი ჩამოსვლა ცვლის იმას, რომ ეს ადამიანები დღეს იმედით უყურებენ ხვალინდელ დღეს. ეს არის ყველაზე არსებითი ცვლილება“, - აცხადებს კორძაია.