„მესამე ძალა - სტრატეგია აღმაშენებელი“ საქართველოში ჩამოსულ ევროპარლამენტარების დელეგაციას ხვდება.როგორც შეხვედრამდე პოლიტიკური პლატფორმის ლიდერმა, გიორგი ვაშაძემ განაცხადა, წინასაარჩევნო პერიოდში უპრეცედენტოა ყურადღება მათი მხრიდან ჩვენს ქვეყანაზე. გიორგი ვაშაძის თქმით, მან დღეს რამდენიმე შეხვედრა გამართა ევროპელ პარტნიორებთან, რომლებიც ერთხმად თანხმდებიან, რომ პოლიტიკური პოლარიზება ქვეყანაში უნდა დასრულდეს.

„უპრეცედენტოა ყურადღება განსაკუთრებით ევროპარლამენტარების მხრიდან, ამდენი ევროპარლამენტარი არც წინა არჩევნებზე არ ჩამოსულა, რაც თავისთავად უსვამს ხაზს ამ არჩევნების მნიშვნელობას. მე დღეს ბევრ ჩვენს ევროპელ პარტნიორთან მქონდა შეხვედრა, ისინი ყველა თანხმდებიან, რომ პოლარიზება დასასრულებელია ამ ქვეყანაში და ძალიან დიდი მხარდაჭერა გვაქვს ჩვენ, იმ პოლიტიკურ ძალებს, ვისაც სურს, რომ გაარღვიოს ეს ორპოლუსიანობის მოჯადოვებული წრე. დანარჩენი გვექნება საარჩევნო გარემოზე საუბარი და რაც მთავარია ხვალინდელ დღეზე საუბარი, თუ რამდენად მნიშვნელოვანია სტაბილურობისთვის მათი აქ ყოფნა. ჩვენ „მესამე ძალა - სტრატეგია აღმაშენებელი" სწორედ ამაში ვართ მათი პარტნიორები, რომ გვინდა სტაბილური განვითარება ამ ქვეყნის, ყველას ვთხოვ, რომ გამოვფხიზლდეთ" , - განაცხადა გიორგი ვაშაძემ.