„ნაცმოძრაობის“ ფორმალური თავმჯდომარე როდესაც აცხადებს, რომ „ქართულმა ოცნებამ“ წააგო, ის რეალობაზე მეტად აცდენილია საკუთარ სიტყვებს. საკუთარი სიტყვების არ სჯერა ამ დროს ადამიანს, როდესაც ამას აკეთებს, - ასე ეხმაურება „ქართული ოცნების“ აღმასრულებელი მდივანი მამუკა მდინარაძე „ნაციონალური მოძრაობის“ თავმჯდომარის და თბილისის მერობის კანდიდატის ნიკა მელიას განცხადებას, რომ „ქართულმა ოცნებამ“ დიდი სხვაობით წააგო.

მდინარაძის განცხადებით, „ნაციონალური მოძრაობა" წინა არჩევნების შემთხვევაშიც ასე ამბობდა.

„ეს კინო ჩვენ ნანახი გვაქვს, წინა შემთხვევაშიც ისინი ამბობდნენ, რომ მათ მოიგეს არჩევნები. თუ საზოგადოების შეცდომაში შეყვანაა მიზანი, ამ შემთხვევაში, ოდნავ ადეკვატურები მაინც რომ იყვნენ, უნდა ამბობდნენ, დავუშვათ, რომ რაღაც პროცენტი ვერ მიიღო „ქართულმა ოცნებამ“ და ჩვენ ამდენით ნაკლები მივიღეთ მხოლოდო. მაგრამ როდესაც ისინი საუბრობენ, რომ „ჩვენ მოვიგეთ არჩევნები“, ამას უკვე კომენტარიც აღარ სჭირდება, აქ უკვე ყველაფერი ნათელია, რამდენად არაადეკვატურები არიან ისინი მოვლენების მიმართ და რა ხარისხის მცდელობა აქვთ საზოგადოების შეცდომაში შეყვანის“, - აცხადებს მამუკა მდინარაძე.

ცნობისთვის, „ნაციონალური მოძრაობის“ თავმჯდომარის, ნიკა მელიას განცხადებით, „ქართული ოცნება“ ადგილობრივი თვითმმართველობის არჩევნებს აგებს.

„მონაცემებზე დაყრდნობით გეუბნებით, თბილისი „ქართულმა ოცნებამ“ წააგო. აგებენ ორივე ნაწილში, - რეფერენდუმის ნაწილში ჯამურად მნიშვნელოვნად, დრამატულად აგებენ და აგებენ თბილისის მერის ნაწილშიც“, - განაცხადა მელიამ.