გიგა ბოკერია - როცა პოლიტიკური ხელმძღვანელი ხარ და გაქვს მართვის სადავეები, იქ გამჭვირვალობის დამატებითი ვალდებულებები შემოდის, რომლისგანაც ივანიშვილი თავის არიდებას ცდილობს

როცა პოლიტიკური ხელმძღვანელი ხარ და მართვის სადავეები გაქვს, იქ გამჭვირვალობის დამატებითი ვალდებულებები შემოდის, რომლისგანაც ივანიშვილი თავის არიდებას ცდილობს, - ასე გამოეხმაურა „ევროპული საქართველოს“ თავმჯდომარე, გიგა ბოკერია Pandora Papers - ის მიერ გამოქვეყნებულ ინფორმაციას, სადაც ექსპრემიერი ბიძინა ივანიშვილიც ფიგურირებს.

ბოკერიას თქმით, "ივანიშვილის შემთხვევაში უამრავი საფუძველი არსებობს ვიფიქროთ, რომ საუბარია იმ ტიპის ინფორმაციის დამალვაზე, რომელიც მისთვის შეიძლება პოლიტიკურად პრობლემა აღმოჩნდეს".

„ზოგადად, ოფშორები არალეგიტიმური ამბავი არ არის, ოღონდ არის ხოლმე რიგი შემთხვევები, განსაკუთრებით, როცა პოლიტიკურად აქტიურ ადამიანებს ეხება, რომლებიც სხვათა შორის ცალკე რეგულირების ქვეშ იმყოფებიან, როცა აშკარად მალავენ ქონებას, აქ ხშირად შეიძლება იყოს მაქინაციების, გადასახადების დამალვის სურვილი, ამა თუ იმ ქვეყნის რეგულაციებიდან თავის აცილების შესაძლებლობა, ან ამოცანა, რომ მათი პოლიტიკური მანევრები, რომელსაც ახორციელებენ მათი კაპიტალის მეშვეობით, საზოგადოებისთვის დასანახი არ იყო. ავტომატურად ეს ასე არ არის, არ ეგონოს ვინმეს, რომ ავტომატურად ყველას, ან უმრავლესობას ბრალი უნდა წავუყენოთ, ვინც ოფშორებს იყენებს, მაგრამ ივანიშვილის შემთხვევაში უამრავი შემთხვევა და საფუძველი გვაქვს ვიფიქროთ, რომ სწორედ საუბარია იმ ტიპის ინფორმაციის დამალვაზე, რომელიც მისთვის შეიძლება პოლიტიკურად პრობლემა აღმოჩნდეს, რადგან ის მართავს ამ ქვეყანას. ზოგადად, როცა პოლიტიკური ხელმძღვანელი ხარ და მართვის სადავეები გაქვს, იქ გამჭვირვალობის დამატებითი ვალდებულებები შემოდის, რომლისგანაც ივანიშვილი თავის არიდებას ცდილობს“, - განაცხადა ბოკერიამ.

გამომძიებელ ჟურნალისტთა საერთაშორისო კონსორციუმმა (ICIJ) და მისმა მედია პარტნიორებმა გამოაქვეყნეს მასალები, რომლებიც, მათი მტკიცებით, მსოფლიოს სხვადასხვა ქვეყნის პოლიტიკოსებისა და საჯარო მოხელეების ოფშორებში დამალული აქტივების შესახებ კონფიდენციალური ფინანსური ჩანაწერების მასიური გაჟონვაა.

გამომძიებელ ჟურნალისტთა საერთაშორისო კონსორციუმის ინფორმაციით, მასალებში საუბარია საქართველოს ყოფილ პრემიერ-მინისტრ ბიძინა ივანიშვილზეც.

ხათუნა ბურკაძე - დიდი სტრატეგიის შემუშავებით შევძლებთ ქვეყნის ინტერესების უზრუნველყოფას
გიორგი ჭიჭინაძე - საპენსიო რეფორმამ ძალიან მოკლე ვადაში დაადასტურა მდგრადობა
ქართული პრესის მიმოხილვა 25.10.2021
მეთიუ ბრაიზა - მიხეილ სააკაშვილის დაბრუნებამ კრიზისული სიტუაცია კიდევ უფრო გაამძაფრა, მაგრამ ყოფილი პრეზიდენტის დაკავება არ იყო ჭკვიანური პოლიტიკური ნაბიჯი
თბილისი აუთლეტ ვილიჯი ცენტრალური და აღმოსავლეთ ევროპის საუკეთესო პროექტად დასახელდა