ადგილობრივი თვითმმართველობის არჩევნების შედეგად სახეზეა ორპოლუსიანობის საფრთხე და მომავალი პოლიტიკური კრიზისის ნიშნები, - ამის შესახებ პარტია „ევროპელი დემოკრატების“ გენერალურმა მდივანმა, მამუკა გამყრელიძემ განაცხადა.
მისი თქმით, ასეთ ვითარებაში პროცესების ესკალაციის თავიდან ასაცილებლად ხელისუფლებამ დაუყოვნებლივ უნდა დაიწყოს კონსულტაციები საპარლამენტო პარტიებთან.
„ხელისუფლებას აქვს ორი გამოსავალი - დანიშნოს ვადამდელი არჩევნები, ან დაუყოვნებლივ დაიწყოს კონსულტაციები საპარლამენტო პარტიებთან, კოალიციური მთავრობის შექმნასთან დაკავშირებით. ეს გარკვეულწილად თავიდან აგვარიდებს პროცესების ესკალაციას და შეაჩერებს პოლიტიკურ კრიზისს.
არ არის გამორიცხული, ზოგიერთმა პოლიტიკურმა პარტიამ დატოვოს პარლამენტი, რაც საფრთხეს შეუქმნის პარლამენტის ლეგიტიმაციას. კარგი იქნება თუ ხელისუფლება დაიწყებს კონსულტაციებს სხვადასხვა საპარლამენტო პარტიებთან, მოლაპარაკებას არასდროს აქვს ალტერნატივა და ყოველთვის ჯობია დაპირისპირებას“, - განაცხადა მამუკა გამყრელიძემ.