პრემიერ-მინისტრის მიერ გაჟღერებული და დაწერილი თითოეული სიტყვა მოწმობს, რომ მიხეილ სააკაშვილი პოლიტიკური დევნის ობიექტია, - აღნიშნული შეფასება ჟურნალისტებთან ფრაქცია "შარლ მიშელის რეფორმების ჯგუფის" თავმჯდომარემ ხათუნა სამნიძემ გააკეთა. სამნიძის თქმით, სასაცილოა არგუმენტი იმის თაობაზე, რომ თითქოს ტელევიზორების მარაგი გამოელიათ და ამიტომ პატიმარ სააკაშვილს ტელევიზორი არა აქვს.

"ყველა ეს განცხადება სახიფათოდ ჟღერს, განსაკუთრებით მაშინ, როცა პატიმარი შიმშილობს და ამაზე ხელისუფლებას არავითარი რეაგირება არა აქვს. გამომდინარე იქედან, რომ ხელისუფლების არც ერთი განცხადება სიტუაციის ადეკვატური არ არის, პოზიტიური პროგნოზის გაკეთება ძალიან რთულია. ნაცვლად იმისა, რომ ხელისუფლება სიტუაციის გამოსწორებაზე ზრუნავდეს, სიძულვილის, ზიზღის შემცველ განცხადებებს აკეთებს და ვითარებას კიდევ უფრო ამძიმებს. ეს მას აწყობს, რადგან წინ მეორე ტურია და თვლის, რომ საჭიროა კიდევ უფრო მეტი დაპირისპირება, რათა ადამიანები კიდევ უფრო დაიბნენ, მეტად დაიძაბნონ და არჩევნებზე არ მივიდნენ", - განაცხადა ხათუნა სამნიძემ.