„ქართული ოცნება“ მე უბრალოდ ვერ გამამწარებს - რა უნდა დამაბრალონ, რით უნდა გამამწარონ?! - ამის შესახებ პარტია „საქართველოსთვის“ ლიდერმა გიორგი გახარიამ ბრიფინგზე განაცხადა, რითაც უპასუხა კითხვას რომან გოცირიძის განცხადებასთან დაკავშირებით, რომ „ქართული ოცნება“ გახარიას გაამწარებს“.

როგორც გახარიამ აღნიშნა, ვერ გაამწარებენ ადამიანები, რომლებიც „ქართული ოცნების“ სახელით საუბრობენ და საკუთარი აზრის გამოთქმის უფლება არ აქვთ.

„ქართული ოცნება“ მე უბრალოდ ვერ გამამწარებს მარტივი მიზეზის გამო, იმიტომ რომ მათ, ვინც არიან, „ბოსები“ და „ქართული ოცნების“ სახელით საუბრობენ, საკუთარი აზრის გამოთქმის უფლება და შესაძლებლობა არ აქვთ. ზოგი წერილს წერს, ზოგი რაღაც სისულელეებს საუბრობს. როგორ შეიძლება მათ გამამწარონ. ვერ გამამწარებენ იმიტომ, რომ მიზანი არის ბევრად უფრო მნიშვნელოვანი. ეს ადამიანები კალეიდოსკოპში იცვლებიან - დღეს ერთია, ხვალ - მეორე. მათ მისია და ფუნქცია არ აქვთ გააზრებული. ისინი ერთ დიდ სცენარში მარიონეტები არიან. როგორ შეიძლება გამამწარონ, ვერ გამამწარებენ. რა უნდა დამაბრალონ?! - გადატრიალება დამაბრალეს, ქართული მიწების გაყიდვა დამაბრალეს, მოღალატეობა დამაბრალეს, ნარკომანობა დამაბრალეს - რა უნდა დამაბრალონ, რით უნდა გამამწარონ?!“- განაცხადა გიორგი გახარიამ.

ცნობისთვის, „ნაციონალური მოძრაობის“ წევრის რომან გოცირიძის განცხადებით, “არ არის გამორიცხული, “ქართულმა ოცნებამ” ისე გაამწაროს გიორგი გახარია, საერთოდ არ უნდოდეს „ოცნებისკენ“ გახედვა”.