ცესკო-ს თავმჯდომარის მოადგილემ, გიორგი სიორიძემ, საარჩევნო კომისიებს მეორე ტურამდე ყველა უბნის გადათვლისკენ მოუწოდა. ეს განცხადება ცესკო-ს თავმჯდომარის მოადგილემ გიორგი სიორიძემ ცესკოს სხდომაზე გააკეთა.
„საარჩევნო ადმინისტრაციის მთავარი ამოცანა არის სამართლიანი არჩევნების ჩატარება და თითოეული ამომრჩევლის ხმის დაცვა. ჩვენ ვნახეთ საერთაშორისო მისიების, ჩვენი საერთაშორისო პარტნიორების უმწვავესი შეფასებები, რომ არჩევნებზე იყო არათანასწორი საარჩევნო გარემო, სადაც ადგილი ჰქონდა მოსყიდვას, ზეწოლას, ნების თავისუფალი გამოვლენის ხელშეშლას. გასაგებია, ამაზე პასუხისმგებელი არის ხელისუფლება, თუმცა საარჩევნო ადმინისტრაციამ უნდა შეასრულოს ის უმნიშვნელოვანესი როლი, რომელიც მის ხელთაა და არ უნდა დატოვოს კითხვის ნიშნები საზოგადოებაში.
ცესკო არ არის ჩვეულებრივი ადმინისტრაციული ორგანო და ამიტომ უნდა გადადგას თამამი ნაბიჯი, რომელიც იქნება ერთი მხრივ კანონიერი და ამასთან მიმართული პოლარიზებული პოლიტიკური გარემოს განმუხტვისკენ. ეს იყო მთავარი ამოცანა, როდესაც ჩვენ ამ საარჩევნო რეფორმაზე ვმუშაობდით, როდესაც გვინდოდა, რომ ამიერიდან არჩევნები აღარ ყოფილიყო ისეთი, როგორიც 2020 წლის 31 ოქტომბერს. როგორც ოპოზიციონერი მოადგილე თავს ვალდებულად ვთვლი, რომ ეს განცხადება გავაკეთო ახლა, სამართლებრივი ვადების შუაწელში, როდესაც დავები მიმდინარეობს საოლქო კომისიებში და ჯერ კიდევ არის შესაძლებელი ისეთი შედეგის დადგომა, რომელიც არ გააჩენს კითხვის ნიშნებს საზოგადოებაში.
არჩევნების მომდევნო დღეებში აღმოჩნდა უამრავი დარღვევა საარჩევნო ოქმებში. ამას სხვადასხვა მიზეზი შეიძლება ჰქონდეს. მაგრამ ჩვენ უნდა გამოვიდეთ ვიწროპროცედურული ჩარჩოებიდან და მოვუწოდებ კომისიებს, საჭიროების შემთხვევაში თავისი ინიციატივით გადაითვალოს უბნები. ეს შეეხება პირველ რიგში თბილისს და ასევე იმ ოლქებს, სადაც მეორე ტური იქნება. ყველა დაინახავს, რა შედეგიც დადგება. ამ შემთხვევაში, მე და თქვენ ვიქნებით არა ოპოზიციური ხმების დამცველი, არამედ საქართველოს ყველა ამომრჩევლის ხმის დამცველი, მიუხედავად იმისა, „ლელოს" მისცა ხმა, "ნაციონალურ მოძრაობას" თუ "ქართულ ოცნებას". წელს მაინც დავასრულოთ იმ სამწუხარო წრეზე ტრიალი, რომელიც საქართელოში არჩევნების ჩატარებასთან არის გაიგივებული“, - განაცხადა სიორიძემ.