ევროკავშირის წარმომადგენლობა საქართველოში, ბათუმში კორპუსის ჩამონგრევისას დაღუპულთა ხსოვნის პატივსაცემად ქვეყანაში გამოცხადებულ გლოვის დღესთან დაკავშირებით განცხადებას ავრცელებს.
„დღეს, საქართველოში გლოვის დღეა. ჩვენ დიდ მწუხარებას გამოვთქვამთ და ვუსამძიმრებთ ბათუმში ტრაგიკულად დაღუპულთა ოჯახის წევრებსა და მეგობრებს“, - ნათქვამია გავრცელებულ განცხადებაში.
შეგახსენებთ, რომ ბათუმში, 26 მაისის ქუჩაზე საცხოვრებელი კორპუსი 8 ოქტომბერს ჩამოინგრა. ნგრევას 9 ადამიანი ემსხვერპლა, მათგან 3 არასრულწლოვანია. შინაგან საქმეთა სამინისტრომ მომხდარ ფაქტზე 3 პირი დააკავა. დაკავებულები არიან აღნიშნული კორპუსის პირველ სართულზე მდებარე ბინის მეპატრონე და ბინაში მიმდინარე სარემონტო სამუშაოებზე დასაქმებული ორი მუშა.