ადვოკატის, გიორგი გელხაურის ინფორმაციით, მიხეილ სააკაშვილის სასიცოცხლო მონაცემების გამოქვეყნების შემთხვევაში, მესამე პრეზიდენტი პენიტენციური სამსახურის მხრიდან შემოწმებაზე უარს განაცხადებს.

როგორც გელხაურმა ჟურნალისტებთან საუბრისას აღნიშნა, სასჯელაღსრულების დაწესებულება სააკაშვილის პერსონალურ მონაცემებს ცუდად იყენებს და მის დაუკითხავად ავრცელებს, რაც დაუშვებელია.

„საავადმყოფოში გადაყვანაზე და მედიკოსების ჩარევაზე მიხეილ სააკაშვილის პოზიცია უცვლელია, ის უარს აცხადებს ექიმების ჩართულობაზე მისი ცუდად გახდომის შემთხვევაში. მისი ჯანმრთელობის მდგომარეობა ამ დროისთვის დამაკმაყოფილებელია. ის თაფლს იღებდა ჩაისთან ერთად, მაგრამ ინფორმაციის გავრცელების შემდეგ მან ყველაფრის მიღებაზე უარი განაცხადა, მათ შორის ნატურალური წვენების მიღებაზეც. მხოლოდ ჩაის და წყალს სვამს. მიხეილ სააკაშვილმა განაცხადა, რომ თუ კიდევ მოხდება მსგავსი რამ, მონაცემების მიცემაზე უარს იტყვის ვინაიდან სასჯელაღსრულების დაწესებულება ამას იყენებს ცუდად, ავრცელებს მის პერსონალურ მონაცემებს, რაც დაუშვებელია”, - აღნიშნა გიორგი გელხაურმა.

ცნობისთვის, გუშინ პენიტენციურმა სამსახურმა განცხადება გაავრცელა, რომელშიც მიხეილ სააკაშვილის სასიცოცხლო მაჩვენებლები იყო ასახული.

„მიხეილ სააკაშვილი იღებს დანიშნულ მედიკამენტებს. მისი ჯანმრთელობის მდგომარეობა ამ დროისათვის დამაკმაყოფილებელია. სასიცოცხლო მაჩვენებლები არის ნორმაში. კერძოდ: წნევა - 120/90; პულსი - 90; სატურაცია - 97. გლუკოზა - 101mg/dl”, - ნათქვამია პენიტენციური სამსახურის განცხადებაში.