არ შეიძლება შიმშილობა პატიმრის გათავისუფლების და პატიმრობის შეცვლის საფუძველი გახდეს, - აღნიშნული განცხადება ჟურნალისტებთან პარლამენტის ადამიანის უფლებათა დაცვის კომიტეტის თავმჯდომარემ მიხეილ სარჯველაძემ გააკეთა.

სარჯველაძის თქმით, შეიძლება ვინმე ფიქრობს, რომ მესამე პრეზიდენტის მიხეილ სააკაშვილის უფლებრივი მდგომარეობა განსხვავებული, უფრო მაღლა მდგომი უნდა იყოს, ვიდრე სტანდარტული შემთხვევა, მაგრამ ეს ასე არ არის და სამართალი მსჯავრდებულებს პოლიტიკური წარსულის მიხედვით ვერ განასხავავებს.

"მიხეილ სააკაშვილის ჯანმრთელობის მდგომარეობა განსაკუთრებული ყურადღების საგანია. ყველა უნდა იყოს მოწოდების სიმაღლეზე საიმისოდ, რომ არ იქნას დაშვებული მისი ჯანმრთელობის მდგომარეობის გართულება და ხელოვნურად გაუარესება. ამ დროისთვის ნამდვილად არ არის ისეთი მდგომარეობა, რამაც შეიძლება რაიმე ფორმით სასჯელის ფორმის შეცვლაზე გვაფიქრებინოს. მისი უფლებაა გამოხატოს პროტესტი, თუმცა ასევე უმჯობესია საუბარი იმის შესახებ, თუ რა არის პროტესტის მიზეზი. პროტესტის მიზეზს ნამდვილად არ წარმოადგენს სასჯელის არაღსრულების მოთხოვნა", - განაცხადა მიხეილ სარჯველაძემ.

კითხვაზე, პირადად ის, როგორც პარლამენტის ადამიანის უფლებათა დაცვის კომიტეტის თავმჯდომარე ხომ არ აპირებს საპატიმრო დაწესებულებაში შესვლას და მესამე პრეზიდენტის მონახულებას, სარჯველაძემ განაცხადა, რომ მისი ციხეში შესვლისა და ვითარების ადგილზე შესწავლის აუცილებლობა არ არსებობს.

"ასეთი რამ რომ არსებობდეს, რა თქმა უნდა, ამას გავაკეთებდი, მაგრამ ამ წუთას ვითარების ადგილზე გაცნობის საჭიროება არ არსებობს. ვფლობ მიმდინარე ინფორმაციას, თუ როგორია მდგომარეობა და პირადად მისვლის საჭიროება ნამდვილად არ არსებობს", - განაცხადა მიხეილ სარჯველაძემ.