საქართველოში ბოლო 24 საათში, კორონავირუსის საწინააღმდეგო ვაქცინის პირველი დოზით მხოლოდ 1703 მოქალაქე აიცრა.

უფრო კონკრეტულად, ბოლო 24 საათის მონაცემებით, ქვეყანაში სულ მცირე ერთი დოზით ვაქცინირებულია 1 002 488 ადამიანი, 10 ოქტომბერს კი აღნიშნული მაჩვენებელი 1 000 785-ს შეადგენდა.

პირველი დოზით ვაქცინაციის მაჩვენებლის შემცირებაზე საუბრობს ჯანდაცვის მინისტრის მოადგილე თამარ გაბუნიაც. მისი ინფორმაციით, პირველი დოზით აცრის რაოდენობა ბოლო 2-3 კვირის განმავლობაში მნიშვნელოვნად დაეცა.

როგორც გაბუნიამ უწყებათაშორისი საკოორდინაციო საბჭოს დასრულების შემდეგ, „ინტერპრესნიუსის“ კითხვის საპასუხოდ აღნიშნა, პირველი დოზით აცრის რაოდენობა ყოველდღიური აცრის 30%-ს შეადგენს.

„ბოლო 2-3 კვირის პერიოდით, პირველი დოზით აცრების რაოდენობა შემცირდა მნიშვნელოვნად. ეს არის ყოველდღიური აცრების არაუმეტეს 30%-ისა. მაგალითად, თუ 3000 აცრა ჩატარდა დღის განმავლობაში, აქედან პირველი დოზა იქნებოდა 1/3, დანარჩენი არის მეორე დოზით აცრა. რაც კიდევ ერთხელ მიუთითებს, რომ ვაქცინაციის პროცესს სჭირდება ხელშეწყობა და გააქტიურება“, - აღნიშნა თამარ გაბუნიამ.

აღსანიშნავია, რომ შაბათ-კვირას ვაქცინის პირველი დოზით აცრის მაჩვენებელი კიდევ უფრო დაბალია. მაგალითად, 10 ოქტომბერს აცრის პირველი დოზა მხოლოდ 683 ადამიანი აიცრა.