საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარე დავით ნარმანიამ სლოვაკეთის მარეგულირებელი კომისიის წარმომადგენლებს საქართველოს ენერგეტიკულ ბაზარზე რეფორმების მიმდინარეობა გააცნო.

როგორც „ინტერპრესნიუსს“ სემეკიდან აცნობეს, შეხვედრაზე დავით ნარმანიამ ელექტროენერგეტიკული ბაზრის ლიბერალიზაციის მიმართულებით განხორციელებულ პროექტებსა და სამომავლო გეგმებზე ისაუბრა, ყურადღება გაამახვილა უცხოელ კოლეგებთან თანამშრომლობისა და გამოცდილების გაზიარების მნიშვნელობაზე.

შეხვედრაში მონაწილეობდნენ სლოვაკეთში საქართველოს საელჩოს წარმომადგენელი არჩილ სოხაძე, სლოვაკეთის მარეგულირებელი კომისიის თავმჯდომარე ანდრეი იურისი, აღმასრულებელი დირექტორი მილან სიგანი და კომისიის სხვა წარმომადგენლები.

მხარეებმა შეხვედრაზე, ასევე, განიხილეს ელექტროენერგიის ბაზრის გახსნის სლოვაკური გამოცდილება, უბალანსობის გაანგარიშების მიდგომები, ბაზრის მონიტორინგის წესები და პრინციპები, განახლებადი ენერგიების ხელშეწყობის მექანიზმები და ელექტროენერგიის ბაზრის ოპერატორის ძირითადი ფუნქციები.