ივერი მელაშვილი - შეიძლება ჰქონდეთ მცდელობა, რომ სააკაშვილი  დაადანაშაულონ, თუმცა, მელაშვილი იქნება თუ ყოფილი პრეზიდენტი, შანსი არაა რაღაც გამოიკვეთოს

ბრალდებული ივერი მელაშვილი მიიჩნევს, რომ საქმეში პოლიტიკური ნიშნებია. როგორც მელაშვილი განმარტავს, მათი დაკავება, ასევე სხდომების განახლება არჩევნებს დაემთხვა.

„ძალიან გათვითცნობიერებული არ ვარ, ალბათ, სასამართლოს ისტორიაში ხდება, რომ პროცესები შეიძლება გადაიდოს და ა.შ. მაგრამ წინასაარჩევნო პერიოდს დაემთხვა ჩვენი დაკავება და ახლაც წინასაარჩევნო პერიოდია, შესაბამისად, საფუძველი მაქვს ფიქრის, რომ გარკვეულწილად ეს საქმე პოლიტიზირებულია",- განაცხადა მელაშვილმა.

კითხვაზე, შესაძლოა, თუ არა საქართველოს ყოფილი პრეზიდენტის დამნაშავეობა დაინახონ ცალკე წარმოებად მიმდინარე საქმეში, სადაც დავალებების გამცემი ზემდგომი პირების გამოსაკვეთად გამოძიება მიმდინარეობს, მელაშვილი აცხადებს, რომ ასე ვერ მოხდება.

"თავიდანვე იყო მცდელობა, ჩვენი საქმიდან გამომდინარე უნდოდათ წინა ხელისუფლების ხელმძღვანელობაზე გასულიყვნენ, რომ თითქოს, რაღაც მოხდა. შეიძლება ჰქონდეთ რაღაც მცდელობა, რომ ყოფილი პრეზიდენტი დაადანაშაულონ რამეში, პრეზიდენტზე უნდოდათ გასვლა, რომ წინა ხელისუფლების პერიოდში ტერიტორიების გადაცემა მოხდა და მსგავსი სისულელეები. მე არ გამოვუკითხივარ არავის, ჩემი პოზიცია იციან, იმდენად აბსურდულია ბრალდებები, ვინც არ უნდა იყოს, მელაშვილი იქნება თუ ყოფილი პრეზიდენტი, შანსი არაა რაღაც გამოიკვეთოს, არაფერი მსგავსი არ მომხდარა, პირიქით, ვიღწვოდით, რომ საწადელისთვის მიგვეღწია, რაც ქვეყანას სჭირდებოდა",- განაცხადა მელაშვილმა.

ცნობისთვის, საქართველოს გენერალურმა პროკურატურამ სახელმწიფო უსაფრთხოების სამსახურთან ერთობლივი თანამშრომლობით დააკავა საქართველოს საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსი ივერი მელაშვილი და საქართველოს შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

პროკურატურის ინფორმაციით, ექსპერტიზის დასკვნით დადგინდა, რომ ბრალდებულები საზღვრების დელიმიტაციის პროცესში ხელმძღვანელობდნენ 1970-80-იან წლებში გამოცემულ რუკებზე დატანილი საზღვრის ხაზებით, რაც არსებითად ეწინააღმდეგება ჩვენი ქვეყნის ისტორიულ საზღვარს, მათ შორის დავით გარეჯთან მიმართებაში.

ნატალია ილიჩოვასა და ივერი მელაშვილს ბრალი დაუზუსტდათ. პროკურატურის ინფორმაციით, ბრალდებულები განზრახ, ზემდგომი პირების დავალებების შესაბამისად მოქმედებდნენ.

ხათუნა ბურკაძე - დიდი სტრატეგიის შემუშავებით შევძლებთ ქვეყნის ინტერესების უზრუნველყოფას
ქართული პრესის მიმოხილვა 25.10.2021
მეთიუ ბრაიზა - მიხეილ სააკაშვილის დაბრუნებამ კრიზისული სიტუაცია კიდევ უფრო გაამძაფრა, მაგრამ ყოფილი პრეზიდენტის დაკავება არ იყო ჭკვიანური პოლიტიკური ნაბიჯი
თბილისი აუთლეტ ვილიჯი ცენტრალური და აღმოსავლეთ ევროპის საუკეთესო პროექტად დასახელდა
კახა ოქრიაშვილი - ბატონი სააკაშვილი ჰიტლერი რომ ყოფილიყო, 2011 წელს, როცა ბიძინა ივანიშვილმა პოლიტიკაში მოსვლის შესახებ განაცხადა, ყველა მხუთავი აირის კამერაში მოხვდებოდა