ძალიან თვალსაჩინო იყო ის, რაც თავისუფლების მოედანზე და რუსთაველზე ხდებოდა - არ არის საინტერესო რას იტყვის ხელისუფლება , - ამის შესახებ "ნაციონალური მოძრაობის" წევრმა, ეკა ხერხეულიძემ თავისუფლების მოედანზე მიხეილ სააკაშვილის გათავისუფლების მოთხოვნით აქციის დასრულების შემდეგ "ინტერპრესნიუსთან" საუბრისას განაცხადა.
როგორც მან აღნიშნა, მნიშვნელოვანია, რამდენად გადამდები იყო ეს ქართველი საზოგადოებისთვის, რომელმაც გადაწყვეტილება უნდა მიიღოს 30 ოქტომბერს.
"საზოგადოებამ უნდა გაიგოს, რომ მიხეილ სააკაშვილი არის პოლიტიკურად დევნილი და ის არის დასახსნელი პატიმრობიდან.
ხელისუფლება არის მილევად რეჟიმში და ნამდვილად აღარ ვინტერესდები მათი აზრით. მორალური და პოლიტიკური უპირატესობა ხალხისკენაა და ეს ადრე თუ გვიან გამარჯვებით გაფორმდება, ხელისუფლებაც ამას აცნობიერებს.
ყოველი აქტივობა, რომელიც დაკავშირებულია პოლიტიკურ მიზანთან ძალიან მნიშვნელოვანია. დღევანდელი დღე იყო მომგებიანი არა მხოლოდ "ნაციონალური მოძრაობისთვის", არამედ ქვეყნისთვის, რადგან მსგავსი სიმშვიდით და ერთობით გამოხატული ნება და დასავლური ორიენტირი, რომელიც არის ის ღირებულებები, რომელიც მიხეილ სააკაშვილმა პოლიტიკურ დღის წესრიგად უქცია.
დღევანდელი აქციაც ამისკენ იყო მიმართული და ხვალ და ზეგ უფრო დიდი გავლენა ექნება ამ პროცესებს, ვიდრე დღეს აღიქვა საზოგადოებამ", - განაცხადა ხერხეულიძემ.