ბექა ბასილაია - თუ ამის საჭიროება იქნება, პენიტენციურმა სამსახურმა საშუალება უნდა მოგვცეს, რომ საკანში მოვინახულოთ მიხეილ სააკაშვილი

რუსთავის მე-12 პენიტენციურ დაწესებულებასთან საქართველოს მესამე პრეზიდენტის, მიხეილ სააკაშვილის მოსანახულებლად მისი ადვოკატები მივიდნენ.

ადვოკატის, ბექა ბასილაიას ინფორმაციით, უახლოეს დღეებში შედგება კონსილიუმი და ექიმების გუნდი მოინახულებს მიხეილ სააკაშვილს.

მისივე თქმით, ყოფილ პრეზიდენტს მნახველებთან შესახვედრად ორი სართულის ავლა უწევს, შესაბამისად თუ ამის საჭიროება იქნება, პენიტენციურმა სამსახურმა მნახველებს სააკაშვილის საკანში მონახულების საშუალება უნდა მისცეს, რათა მისი ჯანმრთელობა დამატებით არ დამძიმდეს.

„დღეს მიხეილ სააკაშვილის შიმშილობის მეთვრამეტე დღეა. ყველას კარგად გვესმის, რომ მისი ჯანმრთელობის მდგომარეობა ყოველდღიურად უფრო სუსტდება. ამავდროულად, გადამწყვეტი ბრძოლის დრო ახლოვდება, საიმისოდ, რომ საქართველო ოლიგარქიული მარწუხებისგან გათავისუფლდეს და ქართველმა ხალხმა თქვას თავისი ხმამაღალი სიტყვა. ნამდვილად არ შეიძლება მესამე პრეზიდენტი პოლიტიკური მოტივაციით იმყოფებოდეს საპყრობილეში და ქართულმა საზოგადოებამ დაუშვას ის შეცდომა, რაც 90-იან წლებში ზვიად გამსახურდიასთან დაკავშირებით დაგვემართა.

იმედია, უახლოეს დღეებში შედგება კონსილიუმი და ექიმების გუნდი მოინახულებს მიხეილ სააკაშვილს. როგორც კი ექიმებისგან მივიღებთ შესაბამის რეკომენდაციას, ვიმოქმედებთ ამ რეკომენდაციის შესაბამისად. თუ ამის საჭიროება იქნება, პენიტენციურმა სამსახურმა საშუალება უნდა მოგვცეს, რომ საკანში მოვინახულოთ მიხეილ სააკაშვილი, რათა დამატებითი სტრესი და დატვირთვა არ იყოს მისი ჯანმრთელობისთვის. იმ ვითარებაში, როდესაც მისი ფიზიკური შესაძლებობები კიდევ უფრო დამძიმდება, პენიტენციური სამსახური არ უნდა გაჯიქდეს და ფორმალურ ნაწილზე არ უნდა გამართონ მსჯელობა“, - აღნიშნა ბექა ბასილაიამ.

ალექსანდრე თვალჭრელიძე - ფრიდმანის წინააღმდეგ სანქციების დაწესებამ იდეალური შესაძლებლობა შექმნა კომპანიის გაკოტრების და იქ სახელმწიფო მმართველის იმპერატიული დანიშვნისთვის, ამას კი „ბორჯომის“ ნაციონალიზაცია უნდა მოჰყვეს
ქართული პრესის მიმოხილვა 20.05.2022
იუველ ნოა ჰარარი - ყველაფერი სასწორზე დაიდო, რადგან პუტინმა დაანგრია უდიდესი ტაბუ, გლობალური წესრიგი - მას რომ შედეგისთვის მიეღწია, ეს მთელ მსოფლიოში გამოიწვევდა დესტაბილიზაციას
თამარ ალადაშვილი - გარემოსდაცვითი ინფორმაციისა და განათლების ცენტრს ახალი ფუნქციები ემატება, რაც კიდევ უფრო მეტად შეუწყობს ხელს საზოგადოების გარემოსდაცვით საკითხებში ჩართულობას
„მაკდონალდს საქართველო“ Mc Happy Day-ის საქველმოქმედო კამპანიას იწყებს