საგარეო ურთიერთობათა კომიტეტის თავმჯდომარის, ნიკოლოზ სამხარაძის ხელმძღვანელობით საქართველოს პარლამენტის დელეგაცია, ოფიციალური ვიზიტით ანკარაში იმყოფება.

პარლამენტის პრესსამსახურის ინფორმაციით, ვიზიტის ფარგლებში საქართველოს, თურქეთის და აზერბაიჯანის პარლამენტების საგარეო ურთიერთობათა კომიტეტების თავმჯდომარეების სამმხრივი შეხვედრა გაიმართა. უწყების ცნობით, დელეგაცია ასევე, თურქეთის პარლამენტის საქართველოსთან მეგობრობის ჯგუფს შეხვდა.

„სამმხრივ შეხვედრაზე მთავარ განსახილველ საკითხებს წარმოადგენდა რეგიონული თანამშრომლობის ძირითადი მიმართულებები, შავი ზღვის რეგიონში არსებული გამოწვევები და მათი გადაჭრის გზები, საპარლამენტო კავშირების გაღრმავების შესაძლებლობები და ახალი ინიციატივები, რომლებიც სამმხრივ თანამშრომლობას გააძლიერებს. მეგობრობის ჯგუფთან შეხვედრისას ასევე განიხილეს ოკუპირებულ ტერიტორიებზე არსებული ვითარება, ეკონომიკური კავშირების გაღრმავების შესაძლებლობები და თურქეთის მხრიდან საქართველოს ნატო-ში ინტეგრაციის მხარდაჭერის პრაქტიკული საკითხები.

შეხვედრებზე თურქულმა მხარემ კიდევ ერთხელ დაადასტურა საქართველოს ტერიტორიული მთლიანობის მიმართ მტკიცე და ურყევი მხარდაჭერა.

ვიზიტის ფარგლებში ასევე გაიმართება საგარეო ურთიერთობათა კომიტეტების სამმხრივი სხდომა და შეხვედრა თურქეთის მილი მეჯლისის თავმჯდომარესთან“,- ნათქვამია ინფორმაციაში.