ეს არის სასოწარკვეთილი ნაბიჯი გამომდინარე იქიდან, რომ მელია აგებს თბილისში არჩევნებს, - ამის შესახებ პარტია „ქართული ოცნება - დემოკრატიული საქართველოს“ თავმჯდომარემ, ირაკლი კობახიძემ განაცხადა, რითაც თბილისში ნიკა მელიას წინასაარჩევნო კამპანიის ფარგლებში გამოკრული ბანერების საკითხი შეაფასა.
როგორც კობახიძემ აღნიშნა, მელია ცდილობს მოსახლეობა მოატყუოს, როცა პენსიების ზრდას და სკოლებში უფასო კვებას ჰპირდება.
„მან იცის რეიტინგები, იცის, რომ რეალურად წაგებული აქვს არჩევნების მეორე ტური. ეს არის სასოწარკვეთილი ნაბიჯი და ცდილობს ხალხი, თბილისელები მოატყუოს. სრული აბსურდია, რაც ბანერებზე წერია, მათ შორის, პენსიებზე - კანონით მას ამის უფლება არ აქვს და ამას 240 მილიონი ლარი სჭირდება. იგივე ეხება სკოლებსაც, ამის უფლება კანონით არ აქვს და ამას დამატებით 100 მილიონ ლარზე მეტი სჭირდება. რას აკლებს ამ თანხას, ჯანდაცვას თუ სხვა მიმართულებებს, ესეც საკითხავია. რა თქმა უნდა, ეს არის სასოწარკვეთილი ნაბიჯი გამომდინარე იქიდან, რომ მელია აგებს თბილისში არჩევნებს“, - განაცხადა კობახიძემ.