ნუთუ დაგავიწყდათ, ვის ხელში ვიყავით, როგორი დიქტატორული რეჟიმი სუფევდა ქვეყანაში?! ამ ადამიანებისგან რომელ ჩრდილოვან კაბინეტზეა საუბარი - ეს არასერიოზულობაა,- ამის შესახებ საქართველოს პრემიერ-მინისტრმა ირაკლი ღარიბაშვილმა ჟურნალისტებს განუცხადა, რითაც უპასუხა კითხვას ნიკა მელიას მიერ ჩრდილოვანი კაბინეტის წარდგენასთან დაკავშირებით.

ამასთან, როგორც პრემიერმა აღნიშნა, ნიკა მელიას თბილისში „გარანტირებული წაგება აქვს“.

„ეს მახსენებს საზარელ, ჩვენი ქვეყნის ისტორიაში ტრაგიკულ დღეებს, როდესაც უბედური ტრაგიკული დღეები გვქონდა აგვისტოს ომის დროს და რუსთაველზე ჩვენი საცოდავი ხალხი გამოიყვანეს, „მიშა, მიშა“ აძახებინეს და კონცერტი გამართეს. ეს ხალხია „ნაცმოძრაობა“. ნუთუ დაგავიწყდათ, ვის ხელში ვიყავით, როგორი დიქტატორული რეჟმი სუფევდა ქვეყანაში?! ამ ადამიანებისგან რომელ ჩრდილოვან კაბინეტზეა საუბარი - ეს არასერიოზულობაა. მელიას გარანტირებული წაგება აქვს. კრიმინალია, სამარცხვინოა, რომ ასეთი კრიმინალები დღეს კიდევ რჩებიან პოლიტიკაში. ჩვეულებრივი თეატრია. თავის თავს აჯერებენ. ისევე, როგორც სააკაშვილმა თავის თავს დააჯერა, რომ აქ ჩამოვიდა და მოსახლეობა ტაშით დახვდებოდა. ჰქონდა ილუზიები, რომ არ აღმოჩნდებოდა იქ, სადაც აღმოჩნდა. ასეთ ილუზიებში არიან მელია და სხვები“,- განაცხადა ირაკლი ღარიბაშვილმა.