„დროას“ ლიდერის და ოპოზიციის ნაწილის თბილისის მერის მოადგილის კანდიდატის ელენე ხოშტარიას განცხადებით, თბილისის მთავრობის კოალიციური შემადგენლობა არის შანსი, რომ შეცდომები აღარ დაუშვან.

როგორც ხოშტარიამ დედაქალაქის მთავრობის კოალიციური შემადგენლობის წარდგენის შემდეგ ჟურნალისტებს განუცხადა, ქვეყნის განვითარების მოცემულ ეტაპზე საზოგადოების დაკვეთა სწორედ მრავალფეროვანი კოალიციური მმართველობაა.

„ჩვენი ქვეყნის განვითარების ამ ისტორიულ ეტაპზე საზოგადოების მთავარი დაკვეთა არის არა ერთპარტიული, არამედ მრავალფეროვანი კოალიციური მმართველობა. ეს არის შანსი, რომ ყველა ადამიანის ინტერესი იყოს გათვალისწინებული და ეს არის შანსი, აღარ დავუშვათ შეცდომები და ძალაუფლებაში ერთმანეთი ვაკონტროლოთ. აქედან გამომდინარე, ისევე როგორც პირველ ტურზე, ისე მეორე ტურზე კიდევ უფრო გაფართოებული შემადგენლობით, ბრძოლით, საქმის კეთებით და თავდადებით, გვინდა თბილისის მოქალაქეებს ეს არჩევანი შევთავაზოთ. დარწმუნებული ვარ, ეს არის ის, სადაც თბილისის ყველა მოადგილე საკუთარ თავს იპოვის. ჩვენი ამოცანა არის არა ვინმეს განადგურება, არამედ გამარჯვება და დიდი ეროვნული თანხმობა, რომელიც ქალაქის და ქვეყნის განვითარების წინაპირობა იქნება“, - განაცხადა ელენე ხოშტარიამ.

შეგახსენებთ, რომ „ნაციონალური მოძრაობის“ თავმჯდომარემ და მერობის კანდიდატმა ნიკა მელიამ დედაქალაქის მთავრობის კოალიციური შემადგენლობა წარადგინა. მერის მოადგილეობის კანდიდატებად მელიამ მამუკა ხაზარაძე, ზურაბ ჯაფარიძე, ელენე ხოშტარია, და ირაკლი აბესაძე დაასახელა.