ჩვენ გვაქვს სტრატეგიული დღის წესრიგი, რომელიც ემყარება ევროკავშირი-საქართველოს ურთიერთობების საკვანძო პრინციპებს. ეს დაკავშირებულია შავი ზღვით კავშირების გაძლიერებასთან იმისთვის, რომ შავი ზღვა გადაიქცეს ხიდად ევროკავშირსა და საქართველოს შორის და ჩვენ გვაქვს ძალიან კარგი შედეგები ამასთან დაკავშირებით, - ამის შესახებ ევროკავშირის ელჩმა საქართველოში კარლ ჰარცელმა ბათუმის პორტში განაცხადა.
მისი თქმით, ურთიერთობის აღნიშნული მიმართულება მნიშვნელოვანია არამარტო საქართველოს დემოკრატიული დღის წესრიგის წინ წაწევისთვის, არამედ ეკონომიკური განვითარებისთვის.
„გვქონდა შეხვედრა საქართველოს საზღვაო ტრანსპორტის სააგენტოს უფროსთან და ჩვენს მომავალ თანამშრომლობაზე ვისაუბრეთ. ჩვენ ვიმუშავებთ იმაზე, რომ ბორანის ხაზი მუშაობდეს, რომ საქართველოს საზღვაო დროშა აღიარებული იყოს და ქართველმა მეზღვაურებმა შეძლონ სხვა ქვეყნების დროშების ქვეშ მუშაობა, ვიმუშავებთ ასევე მეთევზეობის განვითარებაზე და შავ ზღვასთან დაკავშირებულ სხვადასხვა მიმართულების განვითარებაზე. ჩვენ ძალიან კარგი თანამშრომლობა გვაქვს და ეს მუშაობა გრძელდება. ამასთანავე, უნდა აღვნიშნო ისიც, რომ ყველა დაინტერესებულ მხარესთან ერთად აქტიურად ვმუშაობთ ამ საკითხზე. რაც შეეხება ინვესტიციებს - ეს არის კიდევ უფრო ფართო ნაწილი ევროკავშირ-საქართველოს ურთიერთობების და ყოველივე ეს ძალიან მნიშვნელოვანია არამარტო საქართველოს დემოკრატიული დღის წესრიგის წინ წაწევისთვის, არამედ ეკონომიკური მდგრადი განვითარების უზრუნველსაყოფად, ინვესტორების მოსაზიდად და საბოლოო ჯამში საქართველოს ყველა მოქალაქისთვის სარგებლის მოსატანად“, - განაცხადა ჰარცელმა.