ეს არის შეშინებული, არაადეკვატური ხელისუფლების დანაშაულებრივი ქმედება, რომელსაც მიზანი აქვს, გაანეიტრალოს ის ადამიანები, რომლებიც არჩევნების გაყალბების სქემის გაშიფვრაში აქტიურად მონაწილეობდნენ, - ამის შესახებ „ერთიანი ნაციონალური მოძრაობის“ წევრმა ანა წითლიძემ განაცხადა, რითაც ხობში ყოფილი ძალოვანის ლექსო რაფავას დაკავებას და პოლიციის მაიორის რუსლან შამახიას სახლში ჩხრეკის ჩატარების ფაქტს ეხმიანება.

მისივე თქმით, აღნიშნული ფაქტის შესახებ „ნაციონალური მოძრაობა“ საელჩოებსა და სადამკვირვებლო ორგანიზაციებს მიაწვდის ინფორმაციას.

„ეს არის შეშინებული, არაადეკვატური ხელისუფლების დანაშაულებრივი ქმედება, რომელსაც ერთადერთი მიზანი აქვს, რომ გაანეიტრალოს ის ადამიანები, რომლებიც აქტიურად მონაწილეობდნენ არჩევნების გაყალბების სქემის გაშიფვრაში.

მოვუწოდებ „ქართულ ოცნებას“, რომ არ არსებობს არანაირი ბერკეტი და მეთოდი რითაც ისინი ამ ბიჭების ან მოსახლეობის დაშინებას შეძლებენ. ყველა ამ ფაქტთან დაკავშირებით ჩვენ უკვე მივაწოდეთ ინფორმაცია ყველა საერთაშორისო სადამკვირვებლო მისიებს, ასევე ინფორმაციას მივაწვდით საელჩოებს და ყველა სადამკვირვებლო ორგანიზაციას და თითოეულ ამ ადამიანს ჩვენ დავიცავთ“, - განაცხადა წითლიძემ.