მივმართავ ივანიშვილს, ღარიბაშვილს, კობახიძეს და ვინც კი არიან ჯერჯერობით იქ, სადაც არიან, მალე ეს ბრძოლა გაიშლება მთელი ქვეყნის მასშტაბით, - ასე მიმართა „ნაციონალური მოძრაობის“ თავმჯდომარე, ნიკა მელიამ პარლამენტის წინ გამართულ შეკრებაზე ხელისუფლების წევრებს.

როგორც მან აღნიშნა, მუდმივი პროტესტი მიეძღვნება ქვეყანაში სამართლიანობას და არჩევნებზე „მოპარული ხმების უკან დაბრუნებას“.

„ძალიან სამარლიანი ბრძოლა მიეძღვნება უბრალოდ სამართლიანობას და ჩვენი მოპარული ხმების უკან დაბრუნებას, ცვლილებებს დიდწილად. ეს აუცილებლად გულისხმობს იმ დაკავებული ადამიანების გათავისუფლებას, რომლებიც თქვენ დაიჭირეთ მხოლოდ და მხოლოდ იმიტომ, რომ ისინი იყვნენ ოპოზიციის მხარდამჭერები, ჩაუდეთ იარაღები და ხელყუმბარები სხვადასხვა რეგიონებში. მესმის, ეს ბრძოლა არის მძიმე, მაგრამ ამავე დროს, ხომ არის საამაყო? ეს ბრძოლა შესაძლებელია დამღლელია მავანისთვის, მაგრამ ამავე დროს, ამაღელვებელია. ეს ბრძოლა ნამდვილად არის სტრესული, მაგრამ ამავე დროს თავისუფალი ადამიანების მიერ თავისუფლად გამოხატული ნებით ჩართულ ბძროლას ვადევნებთ თვალ-ყურს და არა ძალდატანებით, არა ვიღაცის „დიქტანტით“, - განაცხადა მელიამ.