ანტივაქსერობის არ იყოს, ანტირემდესივირული განწყობებიც არსებობს. ბევრი კლინიკა დღემდე არ იყენებს „რემდესივირს“ და ამით ისინი პაციენტების უფლებებს ლახავენ, - ამის შესახებ თბილისის ინფექციური საავადმყოფოს გენერალურმა დირექტორმა, თენგიზ ცერცვაძემ ჟურნალისტებს განუცხადა.
მისი თქმით, დღეს საქართველოში ამ პრეპარატს ბევრი კლინიკა არ იყენებს, რაც ცერცვაძის შეფასებით, პაციენტის უფლებების შელახვაა.
„ეს პრეპარატი არ არის პანაცეა, ეს არ არის 100%-იანად ეფექტური, მაგრამ სწორად გამოყენებული, მხედველობაში მაქვს პირველი ერთი კვირის მანძილზე, როდესაც ვირუსი ჯერ კიდევ მრავლდება ორგანიზმში, ის საკმარისად ეფექტურია და რაც დრო გადის, მეტი კვლევა იდება, რომ ის აუმჯობესებს დაავადების მიმდინარეობას, ამოკლებს გამოჯანმრთელებას და რაც მთავარია, ამცირებს სიკვდილობას. სულ უფრო ნაკლები სკეპტიკოსი რჩება მსოფლიოში, თითზე ჩამოსათვლელი და სამწუხაროა, რომ საქართველოში, ანტივაქსერობის არ იყოს, ანტირემდესივირული განწყობებიც არსებობს. ბევრი კლინიკა დღემდე არ იყენებს „რემდესივირს“ და ამით ისინი პაციენტების უფლებებს ლახავენ“, - განაცხადა ცერცვაძემ.