შავი ზღვის რეგიონში თქვენ ჩვენი ძალიან მნიშვნელოვანი მოკავშირე და პარტნიორი ხართ, - ამის შესახებ აშშ-ს მეექვსე ფლოტის მეთაურმა, ვიცე ადმირალმა ჯინ ბლეკმა განაცხადა.
მისი თქმით, საქართველოს მნიშვნელობა აშშ-ის თავდაცვის მდივნის, ლოიდ ოსტინის ვიზიტმაც დაადასტურა.
„საქართველოს მნიშვნელობა ნათელია იმითაც, რომ საქართველოში ცოტა ხნის წინ ვიზიტით იმყოფებოდა აშშ-ის თავდაცვის მდივანი. აქ ვარ მეც, მეექვსე ფლოტის, აშშ-ის სამხედო-საზღვაო ძალებისა და ნატო-ს წარმომადგენელი. თქვენ ძალიან მნიშვნელოვანი მოკავშირე და პარტნიორი ხართ შავი ზღვის რეგიონში. მოუთმენლად ველით თქვენთან ერთად მუშაობას, მადლობელი ვართ არაჩვეულებრივი და თბილი დახვედრისთვის“, - განაცხადა ბლეკმა.
ბათუმის პორტში ორი ამერიკული სამხედრო ხომალდი USS Mount Whitney და USS Porter-ი შემოვიდა. Mount Whitney აშშ-ის მე-6 ფლოტის სამეთაურო და მართვის საზღვაო ხომალდია. USS Porter (DDG 78) Arleigh Burke-ის კლასის მართვადი სარაკეტო გამანადგურებელია. ხომალდს აქვს ტექნიკური მონაცემები მოიგერიოს წყალქვეშა ნავები და ბალისტიკური რაკეტები.