პოლონეთმა ბელარუსთან საზღვარზე დამატებითი ძალები, მესაზღვრეები, პოლიცია და სამხედროები, განალაგა, რადგან, ქვეყნის ხელისუფლებაში აცხადებენ, რომ ევროკავშირში შეღწევის მიზნით ბელარუსიდან ასობით მიგრანტი მიემართება.

პოლონეთის თავდაცვის სამინისტროს ინფორმაციით, ქვეყანას ახლა რეგიონში 12 000 ჯარისკაცი ჰყავს განთავსებული.

"მზად ვართ ნებისმიერი სცენარისთვის", - წერს პოლონეთის შინაგან საქმეთა მინისტრი მარიუშ კამინსკი „ტვიტერზე“.

პოლონეთი აცხადებს, რომ ბელარუსი, მიგრანტების დიდი ჯგუფის წახალისებით, „დიდ პროვოკაციას“ აწყობს.

„ბელარუსს სურს გამოიწვიოს დიდი ინციდენტი, სროლებითა და მსხვერპლით“, - განაცხადა პოლონეთის საგარეო საქმეთა მინისტრის მოადგილე პიოტრ ვავრჟიკიმ.

პოლონეთის სადაზვერვო სამსახურების კოორდინაციის სამინისტროს პრესსპიკერის, სტანისლავ ზარინის ინფორმაციით, ჯგუფი პოლონეთში "მასობრივად" შესასვლელად ემზადება. მისივე თქმით, მიგრანტები ბელარუსის შეიარაღებული ქვედანაყოფების მკაცრი კონტროლის ქვეშ იმყოფებიან, რომლებიც წყვეტენ, თუ რა გზით შეუძლია ან არ შეუძლია ჯგუფს წასვლა.

„ეს ბელარუსის რეჟიმის მტრული ქმედების კიდევ ერთი მაგალითია, რომელიც მიმართულია პოლონეთის წინააღმდეგ“, - აღნიშნა სტანისლავ ზარინმა.